Wezareta Çandinî û Çavkaniyên Avê ya Hikûmeta Herêma Kurdistanê di derbarê bandora barana du rojên borî ya li ser bendavên Herêma Kurdistanê de daxuyaniyek da.
Di daxuyaniyê de hat diyarkirin ku ji ber pêla baran barînê û lêhiyên du rojên borî rêjeya ava li bendavên Herêma Kurdistanê zêdetir bûye.
Di daxuyaniyê de hatiye diyarkirin ku ji ber barana du rojên borî, li her du bendavên Derbendîxan û Dukanê zêdetirî 100 milyon metre kûp av zêde bûye.
Hate diyarkirin ku asta ava bendava Derbendîxanê metrek û nîv û ya Dukanê jî 70 santîmetre bilind bûye.
Her wiha hate eşkerekirin li sinorê îdareya Germiyan û Silêmaniyê bendavên biçuk tije bûne. Li Hewlêrê jî bendavek tije av bûye û di serde rijaye.
Di daxuyaniyê de hate diyarkirin ku li sînorê parêzgeha Dihokê jî ava bendavan zêde bûye, lê bi rêjeyek kêmtir.
Li aliyê din ji ber baranê li hin navçeyên Herêma Kurdistanê lehî rabûn, li hin deveran wesayît di bin avê de man. Welatiyên ku di bin avên li malan de mane, windahiyên madî yên cidî dijîn.
Qeymeqamtiya Kelarê nava rojê daxuyaniyek da û hişyarî da ku wê lehî rabe. Li Çemçemal jî ji ber lehiyê 2 welatiyan jiyana xwe ji dest dan.
DERIYÊ SÎNOR Ê KÊLÊ HATE GIRTIN
Ji ber barîna befir û barana zêde, çûnûhatina li Deriyê Sinorî ya Kêlê ya li bajaroka Qeladizê ku dikeve navbera Başûr û Rojhilatê Kurdistanê de, sekinî. Hat ragihandin ku ji ber barîna befra zêde rê li trafîkê hatiye girtin, tevgera bazirganî ya li ser derî sekiniye.
Di derbarê girtina deriyê sînorî de Rêveberê bajaroka Hêro, Muhsin Hisên ji ajansa Rojnews re axivî û got: “Li aliyê başûr rê hatiye paqijkirin, lê li aliyê Rojhilatê Kurdistanê heta niha rê nehatiye paqijkirin. Ji ber vê çendê deriyê sinorî girtî maye.”
