Riha; derguşa mirovahiyê û bajarê pêxamberan… Bi cihê xwe yê qedîm ê di dîrokê de, bajarekî wisa ye ku wate û rê dide koka hemû hebûnê. Çavkaniya dewlemendiya wê ya çandî, ji derketina hemû ol û pêxamberên li ser van axan tê. Riha ku derguşa olan e, di çavê gel de wekî bajarê pêxamberan bajarekî pîroz e. Navenda înzivayê ya ronîbûn û gihîştina mertebeya kamilbûnê ye. Di heman demê de, ew bajar e ku Tevgera Azadiyê PKK jî lê gihîştiye ronahiyê. Lewre Rêber Apo li ser vê axê ji dayik bûye û ev ax, bi lêgerîna wî ya heqîqetê re gihîştiye cewherê nasnameya xwe ya ronakbîr.
Çawa ku her lêgerînek mirov dibe ser wateya tiştekî û çalakiya afirandinê; PKK jî wekî tevgera azadbûn û nûbûnê, mirov di her kêliya jiyanê û di her zehmetiyê de dibe ser lêgerîna wateyê; di encama vê lêgerînê de jî dibe ser afirandinê. Şehîdên berdêlên mezin û berxwedanê, bûne navê dîroka mirovahiyê û wateyê. Mirovahî cih daye gerîlayên ku bûne efsane di rûpelên dîrokê de û bi vê re tiştê rast û xweş gihandiye heqîqetê. Ji ber vê yekê ye ku ax û gelên Kurdistanê her dem bûne navenda berxwedanên mezin. Bajarê Rihayê jî di lêgerîna azadiyê de pêşengî ji wateyên nû re kiriye, bi lehengiya xwe kok vedaye û ev yek li her derê Kurdistanê belav kiriye.
Ev bajarê qedîm; ji dema klan û qebîleyan heta civakbûyîna îro, li ser bingeha parastina azadî û nasnameya xwe, çanda xwe ya civakî kiriye çavkaniya gelek berxwedanan.
Çîroka jinên ciwan ên ku ji vê kevneşopiya berxwedanê tên, ku dîrok û hevalên wan dê her dem bi rêz û serbilindî bi bîr bînin, di vê bajarê pîroz re derbas dibe. Jina ciwan Binevş Altay, li navçeya Pirsûsê ya Rihayê ku welatparêzî tê de bi kûr tê jiyîn, di malbateke welatparêz de çavên xwe li cîhanê vedike. Bi pîroziya axa ku lê mezin bûye ve xwe dipêçe û li dijî hemû xerabiyan her dem bi serhildêrî û serbilindî mezin dibe. Salên naskirina kedê hîn di zaroktiyê de destpê dikin. Bi dilsoziya xwe ya ji bo welat û axê, jiyaneke bi rêgêz dipejirîne. Nakokiyên wê yên li hemberî pergalê, wê ber bi lêgerînên mezin ve dibin.
Binevş a ku diwanzdeh salan di dibistanên dewletê de dixwîne, bêyî ku ji cewherê xwe tiştekî winda bike, tu carî nakeve xefika lîstikên şerê taybet ê pergalê. Her udi civakê de şahidiya rastiya jinê dike, hîs dike ku ew ne aîdî vê pergalê ye. Ji bo vê yekê, têdigihîje ku divê teqez rêyeke çareseriyê bibîne.
TEVLÎ BERXWEDANA KOBANÊ YA DÎROKÎ KU LI CÎHANÊ DENG VEDAYÎ DIBE
Bi taybetî bi gotina Rêber Apo ya ku dibêje; ‘Mirovê ku wate û hîs afirandiye, mirovê herî bi hêz e’ di temenekî biçûk de nas dike û pir di bin bandora vê gotinê de dimîne. Ev gotina Rêber Apo, di kesayetiya Binevşa ciwan de şopeke mezin dihêle; wê di cîhana hest û raman de ber bi lêgerîna azadiyê ve dibe. Hestê wijdanê yê ku hîn di zaroktiyê de di dilê wê de kûr bûye, dibe sedem ku ew bigihîje qonaxeke nû ya biryardariyê. Êrîşên neheq ên li Kurdistanê û hestê berxwedanê yê ku di nav gel de geş dibe, dibe sedem ku ew jî tevlî vê berxwedanê bibe.
Jina ciwan Binevş, di sala 2014’an de ji êrîşên DAIŞ’ê yên li ser Kobanê û ji jiyana gel a tije berxwedan pir bandor dibe. Dema ku di pêvajoya berxwedanê de rewşa perîşan a gelê ku neçar maye ji Rojava koçî Rihayê bike dibîne, hestên wê yên hêrs û tolgirtinê kûrtir dibin. Li dijî çeteyên DAIŞ’ê ku Rojhilata Navîn wêran kiribûn û bibûn xewna tirsê ya hemû cîhanê, ew biryara xwe dide ku li kêleka şervanên azadiyê di nav berxwedanê de cih bigire. Binevş Altay a ku bi vîneke mezin û wêrekiyeke bêsînor biryara şer dide, di sala 2014’an de tevlî nava refên azadiyê dibe û navê Doga Şîn li xwe dike.
LI DIJÎ ÇETEYÊN DAÎŞ’Ê SERBILIND Û LI SER PÊYAN E
Berxwedana dîrokî ya Kobanê ya ku li cîhanê deng veda, bi berxwedana destanî ya bi hezaran fedaîyan rastiya têkoşînek mezin derxist holê. Şervana ciwan Doga jî tevî hemû astengiyan ranewestiya û berê xwe da qadên ku berxwedana dîrokî lê dihat jiyîn. Doga, ji vî pêvajoya şer pir bandor bû. Pêvajoya perwerdeya leşkerî temam kir û li dijî çeteyên DAÎŞ’ê şer kir û bû lêgerînera tolgirtinek mezin. Di her hemleyê de li dijî çeteyên DAÎŞ’ê bi awayek birûmet rawestiya û derbên giran li wan xist.
Gerilla Doga ya ku di rastiya şerê li vir de di gelek mijaran de bû xwedî ezmûn, daxwaz kir ku bigihîje rastiya heqîqeta jiyanê. Di pêvajoya şerê pir dijwar de di şerekî de giranî birîndar bû. Piştî birîndarbûnê di demeke kurt de tedawiya xwe temam kir; tevî birîndariya xwe dîsa di eniyên herî pêş de têkoşîna xwe domand. Li qada ku lê bû, rê neda ku çete gavekê jî bi pêş de gav biavêjin.
Lê belê mercên şer birînên wê kûr kirin û ji aliyê hevalên wê ve ji bo tedawiyê ji qadeke din re hat şandin. Di vê pêvajoyê de dema ku tedawî didît, di heman demê de fersenda hûrbûneke kûr jî dît; beşdarbûna xwe ya hestiyar analîz kir û hewl da ku di kesayetiya xwe de seknekî bîrdozî û têgihîştî nîşan bide.
Doga, di vê pêvajoyê de bi piştgiriya moralê ya mezin a hevalên xwe tedawiya xwe temam kir û vegeriya qadên şer. Piştî pratîka şer a dirêj û dijwar, Doga berê xwe da çiyayan ku wekî qibleya azadiyê didît û li qada Garê hat erkdarkirin. Di nava vê qadê de di yekîneyên bi tevger de cih girt.
Di dema ku di yekîneyên bi tevger de cih girt de, bi jêhatîbûn û çalakbûna xwe di hemû xebatên pratîk de bi awayekî çalak cihê xwe girt. Bi kesayetiya xwe ya mutewazî û durust, bû çavkaniya moralê ji bo hevalên xwe.
Gerilabûn; li hemberî her cûre zehmetiyên jiyana çiyê li ber xwe dan e û bi eşq û evîn hezkirina xweza, çiya û jiyanê ye. Milîtanê wêrek Doga, di xeta azadiya jinê de bi îdîayeke mezin dimeşe. Di çiyayên Kurdistanê yên dijwar de û di mercên herî giran ên van çiyayan de fêr bû ku xwe ava bike. Ji ber vê yekê asîbûn û xisleteke xurt ê çiyayan ji xwe re kir bingeh.
Yek kêliyê jî ji zehmetiyan nereviya û her tim pêşniyar kir ku biçe qadên têkoşînê yên herî dijwar. Hê dema ku li çiyayan nû bû, fêr bû ku zehmetî mirov mezin dikin. Doga ya ku dizanibû ji bo gihîştina armancên mezin divê mirov di zehmetiyên mezin re derbas bibe, ji bo hevalên xwe yên ku li çiyayên Kurdistanê têdikoşin bû hevreya rojên herî dijwar.
JI BO HEVALÊN XWE DIBE MILÎTANEKE MÎNAK
Li çiyayên pîroz ên Kurdistanê ku bûne warê xwedawendan, Doga bi tevlîbûna xwe ya sade û fedakar, li ser her gerîlayê ku nas kirî û dîtî şopeke kûr dihêle. Bi tevlîbûna xwe ya çalak û bi moral, di demeke kurt de di gelek xebatên girîng de cih digire. Xebata ku dimeşîne çi dibe bila bibe, bêyî ku ferq û cudahiyê bixe navberê, bi ciddiyeteke mezin nêzîk dibe. Bi taybetmendiya xwe ya jêhatî rengê xwe dide hemû xebatan. Li ku derê pêdivî hebe li wir amadebûnê, çalakbûn û serkeftinê wekî wezîfeya milîtantiyê dibîne.
Doga ya ku li cihê lê bû û di xebatên ku dimeşand de her tim bawerî dida, bi pratîka xwe baweriya hevalên xwe vala dernaxist. Doga ji bo di warê leşkerî de kûr bibe hewldaneke mezin nîşan da; bi armanca ku xwe ji şêwazê şerê gerîla yê serdema nû re amade bike ku bi rengekî profesyonel tê meşandin, hûr bû; xwe di warê teknîk û taktîk de pêş xist.
Li gel kûrbûna leşkerî, kûrbûna bîrdozî jî ava kir; bi wê rastiyê ku ev kûrbûn tenê bi hewldana fêmkirina Rêbertiyê û bê tawîz dayîn pêkan e, sekna xwe ya dilsoziya bi Rêbertiyê re her tim di jiyana xwe de nîşan da.
Doga, bi salan li çiyayên Kurdistanê bê rawestandin, bi moralek mezin û bi sekneke berxwedêr têkoşiya. Di her qada ku pratîk lê meşand de, li pey xwe şopên kûr hiştin. Ew milîtaneke wisa ye ku bi samîmiyet û xwezayîbûna xwe, hezkirin û rêza hemû hevalên xwe qezenc kir. Doga, bi salan li çiyayên Kurdistanê têkoşiya; li ku derê pêdivî hebû li wir cihê xwe girt.
Bi meşandina xebatan di gelek qadan de, wateya jiyana gerîlatiyê bi jiyankirinê fêr bû. Li qadên ku lê ma û ked da de, her tim bi ser ket ku bibe xwedî kesayetiya milîtanekê ku lêgerîn û bêriya wê tê kirin.
BI ŞEHADETA XWE BÎRANÎNEKE NEMIR DIHÊLE
Gerîla Doga ya ku bi berxwedana xwe serê xwe rakir asîmanê, di têkoşîna azadiya Kurdistanê de bû sembola gelên mazlûm ên ku ber bi serkeftinê ve dimeşin. Gerîlaya wêrek Doga, di 11’ê Çileya 2025’an de di êrîşeke dijmin a li ser Herêmên Parastinê yên Medyayê de gihîşt şehadetê; wê meşa azadiyê ya ku bi îdîa, fedaîbûn û eşqeke mezin tevlî bûbû temam kir û ala têkoşînê dewrî şopdarên xwe kir. Di dîroka Kurdistanê de bi asîbûn û kesayetiya xwe ya şervan, di nava warê qehremanan de cihê xwe girt.
Doga, dibe yek ji wan jinên asî yên ku li çiyayên pîroz ên Kurdistanê can didin axê. Di rêya şehîdan de ronî bû û ji bo gelê xwe yê mazlûm bû meşaleya azadiyê. Bi dilsoziya xwe ya ji bo Rêbertî, gel û hevalên xwe, bû gerîlayeke nimûne. Bi bîranîna xwe ya bihagiran a ku ji hevalên xwe yên têkoşînê re hiştiye, wê di têkoşîna azadiya Kurdistanê de her tim di dilê gelê me û hevalên xwe de bijî.
