Rêxistina Mafên Mirovan a Efrîn-Sûriye ragihand ku çeteyên dewleta Tirk a dagirker (19 Cotmeh) şêniyê bi navê Hisên Xelo û kurê wî Mistefa revandin.
Rêxistinê diyar kir ku Hisên û kurê xwe ji gundê Enqelê yê bajarê Şiyê ne dema ku baxçeyên xwe yên zeytûnan diparastin ji aliyê çeteyan ve hatin revandin.
Rêxistinê der barê bûyerê de ev agahî parve kirin “Dema bav û 4 kurên xwe dîtin çete zeytûnan wan didizin, hewl dan li pêşiya wan bigirin, lê çeteyan gule reşandin. Hisên Xelo jî neçar ma parastina xwe bike û 2 çete birîndar bûn.”
Rêxistinê da zanîn ku Hisên û kurê xwe hîna revandî ne.
Li gorî heman rêxistinê, çeteyên dewleta Tirk hilbirînên zeytûnan ên şêniyê bi navê Elî Sebrî yê ji gundê Alkana yê Şiyê jî dizîn. Rêxistinê diyar kir ku hilbirînên derdora 100 darên zeytûnan ên Elî Sebrî li devera Kala Şiyê bi temamî hatiye dizîn.
Rêxistinê destnîşan kir ku li gundê Xelalka yê bajarê Bilbilê jî çete nahêlin şênî biçin nava zeviyên xwe û da zanîn ku çeteyan li derdora zeviyan çadir û nuqteyên nobetê danîne da ku dest deynin ser zeytûnan şêniyan û bi gefa çekê zeviyan talan bikin.
Heman rêxistinê ragihand ku çeteyan li gundewarê Efrînê derdora 150 kîsên zeytûnan ên Hisên Mihemed Hemo û Îbrahîm Mihemed Hemo û derdora 500 çewalên din ên şêniyê bi navê Ebdurehman Kolîn Hemo dizîn.
