Li herêma Egeyê, li bajarên Mugla, Denîzli û Manîsayê bi dirûşma “Newroza Azadî û Demokrasiyê” û “Newroza Azadî û Yekitiya Demokratîk” pîrozbahiyên Newrozê hatin lidarxistin.
MANÎSA
Li Manîsayê bi dirûşma “Newroza Azadî û Yekitiya Demokratîk” li Qada Lale Newroz hate pîrozkirin. Parlamenterê Mersînê DEM Partiyê Alî Bozan, nûnerên gelek rêxistinên sivîl û bi hezaran welatî beşdarî pîrozbahiyê bûn. Di dema pîrozbahiyê de gelek caran dirûşmên “Bijî Serok Apo”, “Newroz pîroz be”, “Jin, jiyan, azadî”, “Şehîd namirin” hatin berzkirin. Pîrozbahiya Newrozê bi rêzgirtina ji bo yên ku di têkoşîna azadiyê de jiyana xwe ji dest dane dest pê kir.
Hevseroka DEM Partiyê ya Manîsayê Evîn Gunsel pêşî axivî. Evîn Gunsel axaftina xwe bi pîrozkirina Newroza Rêber Apo dest pê kir. Evîn Gunsel diyar kir ku ew ne tenê ji bo pîrozkirina cejnekê li hev civiyane, lê belê ji bo mezinkirina agirê berxwedan, azadî û ji nû ve zayînê li hev civiyane û wiha dewam kir: “Em Newroza 2026an weke ‘Newroza Azadî û Demokrasiyê’ pêşwazî dikin. Newroza îsal ne tenê pîrozbahî ye; bangewaziyeke ji bo mezinkirina têkoşîna azadî, demokrasî û wekheviya gelan e. Ji ber ku em dizanin agirê Newrozê tenê bi têkoşîna rêxistinkirî, bi îradeya yekîtiya neteweyî û bi berxwedana hevpar zêdetir dişewite. Îro her agirekî ku li van meydanan tê pêxistin ne tenê sembolek e, lê belê ragihandina îrade, berxwedan û biryardariya gelan a ji bo avakirina pêşerojeke hevpar e. Qadên Newrozê ûqadên ku gel lê dengê xwe dibêje, îradeya xwe rêxistin dike û îdîaya avakirina pêşerojeke demokratîk mezin dike ne.
Jinên hêja, ruhê herî xurt ê Newrozê di têkoşîna azadiya jinê de jiyan digire. Mîrateya berxwedana Rahşan, Zekîye û Ronahî îro bi felsefeya ‘Jin, Jiyan, Azadî’ bûye şîara azadiya jinên cîhanê. Jin ne tenê parçeyekê vê têkoşînê ne, lê belê bingeha wê ya avaker in. Li hemberî sîstema mêrserwer, şer û polîtîkayên dijminatiya jinê, jin pêşengiya mezinkirina agirê Newrozê ne. Ev agirê Newrozê yê ji Manîsayê bilind dibe, wê bigihîje Amedê, Rojavayê Kurdistanê, hemû Kurdistanê û qadên berxwedanê yên li çar aliyên cîhanê.”
Paşê Hevserokê DEM Partiyê yê Manîsayê Kerem Taylan axivî û wiha got: “Em dizanin ku gelê Kurd gelekî mezin e. Lê belê hêzên serdest vê gelî di nav çar dewletan de parçe kirine. Lê em gelê kevnar ê Rojhilata Navîn in. Em xwedî hêza ku têkoşîna xwe bidomînin û li ser axa xwe xwedî derkevin. Em ne divê li pey hesabên biçûk bikevin. Gelê Kurd di dîrokê de ji bo pîrozkirina Newrozê gelek bedel daye, gelek ked daye. Ji bo pîrozkirina Newrozê gelê me gelek caran canê xwe feda kir. Îro li Manîsayê ez bi rêzdarî li ber hemû hevrêyên ku ji dîrokê heta îro ji bo Newrozê canê xwe feda kirine serê xwe ditewînim.”
Di dawiyê de Parlamenterê Mersînê yê DEM Partiyê Alî Bozan axivî. Alî Bozan bi silavkirina malbatên girtî û malbatên qurbaniyan dest bi axaftina xwe kir. Alî Bozan da zanîn ku ew hemû şehîdên azadî û şoreşê bi minet bi bîr tîne, hemû pêşengên Kurd bi rêzdarî bi bîr tîne û wiha got: “Piçek berê li vir peyama Rêber Apo hate xwendin. Di wê peyamê de Rêber Apo tiştekî wiha dibêje: Me rûpelek nû vekiriye, di vê rûpela nû de azadiya gelê Kurd û gelên Kurdistanê heye. Di vê rûpelê de azadiya Kurdistanê û Rêber Apo heye. Di vê rûpelê de azadiya hemû girtiyên siyasî heye. Ji ber vê yekê em wekî gelê Kurd li pişt bangewazî û helwesta Rêberê Gelê Kurd Abdullah Ocalan in. Hevrêyo, hûn bi bîr tînin, 3 meh berê li rojhilatê Kurdistanê ewrên reş li ser gelê me digeriyan. Lê îro gelê me bi têkoşîna xwe û bi ittîfaqa yekîtiyê ya ku ava kiriye, ew ewrên reş belav kirine.”
Piştî axaftinan bernameya Newrozê bi stranên Koma Rojhilat, Koma Agire Zerdeşt, stranbêj Cevdet Gulbau, Azad Ararat û Murat Elmastaş berdewam kir û bi gerandina govendê bi dawî bû.
MUGLA
Rêxistina DEM Partiyê ya Muglayê, li navçeya Mîlasê li Bazara Akkentê agirê Newrozê vêxist. Tevî Parlamentera Bedlîsê ya DEM Partiyê Semra Çaglar Gokalp, gelek nûnerên saziyên sivîl û welatî bi cilên xwe yên neteweyî herikîn qadê. Pîrozbahî bi merasîma rêzgirtinê dest pê kir û bi domdarî dirûşmên “Jin, jiyan, azadî”, “Bijî berxwedana Rojava”, “Newroz pîroz be” û “Bê Serok jiyan nabe” hatin berzkirin. Di şahiyê de hunermend Rojkar derket ser dikê.
Hevserokên Muglayê Zuhal Macid, Mehmet Kaya û Hevserokên Mîlasê Bêrîvan Îşçî û Hanîfî Yilmaz girse silav kirin. Piştre endamê Meclisa DEM Partiyê KadÎr Baydur, peyama ku Abdullah Ocalan ji Newroza Amedê re şandibû xwend.
Parlamenter Semra Çaglar Gokalp bal kişand ser Pêvajoya Aştî û Civaka Demokratîk û wiha got: “Banga di peyama Newroza Amedê de ne peyameke jirêzê ye. Divê Kurd bêyî cudahiya partî, îdeolojî û fikran yekitiya xwe ya neteweyî ava bikin. Di pêvajoya Rojavayê de Kurd li ser pêyan bûn. Em neçar in ku wî ruhî li her derê û her demê biparêzin.”
DENÎZLÎ
Rêxistina DEM Partiyê ya Denîzliyê, Newroz li kêleka qada bazara girtî ya Taxa Esentepê pîroz kir. Parlamentera Amedê Ceylan Akça û endama PM’ê Aysel Bayta Cansel beşdarî pîrozbahiyê bûn. Di şahiyê de ku jin li refên herî pêş bûn, dirûşmên “Bijî Serok Apo”, “Şehîd namirin” û “Jin, jiyan, azadî” hatin berzkirin. Piştî silavkirina Hevserokên Denîzliyê Cevahîr Kayar û Enes Oge, peyama Newrozê ya Rêber Apo hat xwendin.
Piştre Ceylan Akça bi Kurdî û Tirkî axivî û bal kişand ser mafên etnîkî û çandî yên Kurdan û destnîşan kir ku gelê Kurd dixwaze ziman û nasnameya xwe di destûra bingehîn de bê misogerkirin û bi awayekî azad bijî. Ceylan Akçayê Rêber Apo û girtiyên di girtîgehan de silav kir.
Piştî axaftinan, agirê Newrozê bi coşekê mezin hat vêxistin. Hunermend Şîlan Dora û hunermendên xwecîhî bi strîn û girseyê govend gerand.
AYDIN
Rêxistina DEM Partiyê ya navçeya Sokeyê ya Aydinê pîrozbahiyek li dar xist û bi hezaran welatî bi cilên neteweyî beşdar bûn. Welatiyên ku li Qada Newrozê ya Savucayê civiyan, dirûşmên “Bijî Serok Apo” û “Jin, jiyan, azadî” berz kirin.
Welatiyan li ber stranên Hunermendên Navenda Çanda Mezopotamyayê (NÇM) Newroz pîroz kirin û govend gerandin.
