Li bajarên Tirkiye û Kurdistanê pîrozbahiyên Newrozê berdewam dikin. Li navçeyên Beyoglu, Bagcilar, Kagithane û Sultanbeyli yên Stenbolê, navçeyên Pîran û Xana Axpar ên Amed û li Edene, Mersîn û Dîlokê Newroz hatin pîrozkirin.
Gel li dora agirên Newrozê govend gerandin û dirûşmeyên “Bijî serok Apo”, “Bê Serok jiyan nabe”, “Newroz pîroz be” û “Şehîd namirin” berz kirin. Pîrozbahiyên Newrozê bi deqeyek rêzgirtina ji bo endamê Desteya Hevserokatiyp ya Partiya Yekîtiya Demokratîk (PYD) Salih Muslim dest pê kir. Di pîrozbahiyê de, banga beşdarbûna pîrozbahiyên navendî yên Newrozê ku dê di 22’yê Adarê de werin lidarxistin hate kirin.
STENBOL
Rêxistina DEM Partiyê ya Stenbolê li navçeyên Beyoglu, Bagcilar, Sultanbeylî û Kagithaneyê pîrozbahiyên Newrozê li dar xist. Li her çar navçeyan de bi hezaran kes tevli pîrozbahiyê bûn.
Li Bagcilarê gel li rêya meşê kom bûn, bi gerandina govendê Newrpz pîroz kir. Hevserokê DEM Partiyê yê Stenbolê Çinar Altan, Dayikên Aştiyê û gelek kes tev li pîrozbahiyê bûn. Gel di govendê de dirûşmeya “Newroz pîroz be” berz kir.
Paşê jî di şexsê Salih Muslum de ji bo tevahî cangoriyên Kurdistanê rêz girt. DI pîrozbahiyê de wêneyên Salih Muslim hate vekirin.
Hevserokê DEM Partiyê ya Stenbolê Çinar Altan di pîrozbahiyê de axivî û got: “Em di rojên xemgîn de derbas dibin. Şehadeta Salih Muslim me xemgîn kir. Em ê bi agirê Newrozê bi ser bikevin. Newroza îsal Newroza azadiyê ye, azadî jî bi azadbûna Rêberê Gelê Kurd dê pêk were.”
Pîrozbahî bi gerandina govendê bi dawî bû.
EDENE
Bi pêşengiya Platforma Saziyên Demokratîk a Edeneyê, bi beşdariya bi sedan kesan li taxa Ova ya Seyhanê Newroz hat pîrozkirin. Berî ku agir were pêxistin, girseyê li ber stranan govend gerand. Bi sedan kes ji ciwan bigire heta mezinan, li dora agirê Newrozê kom bûn. Beşdaran dirûşmeyên “Şehîd namirin”, “Bê Serok jiyan nabe” û “Bijî Serok Apo” berz kirin û azadiya fîzîkî ya Rêber Apo xwestin.
Hevseroka DEM Partiyê ya Edeneyê Helîn Kaya di pîrozbahiyê de axivî û Salih Muslim bi bîr anî. Helîn Kaya behsa girîngiya Newrozê kir û got, “Werin em hemû bi hev re agirê azadiyê pêxin.”
Di axaftinan de banga beşdarbûna pîrozbahiya Newrozê ya ku wê di 22’yê Adarê de li Şanoya Vekirî ya Mimar Sinan were lidarxistin, hat kirin.
MÊRSÎN
Li taxa Çilek a navçeya Akdenîzê û taxa Kurdalî ya navçeya Toroslarê Newroz hat pîrozkirin. Di pîrozbahiyê de wêneyên Mazlûm Dogan, Sema Yuce û Rahşan Demîrel hatin hilgirtin. Pîrozbahiya ku bi sedan welatî beşdarî agirê Newrozê hat pêxistin û li dora agir govend hat gerandin. Hevserokê DEM Partiyê yê Mêrsînê Reşat Aşan di de axivî û got, “Em hemû hevalên xwe bi ruhekî Kurdistanî, bi hevrêtiya Kurdistanî, bi ruhê yekîtîya Kurd silav dikin.”
Hevseroka DEM Partiyê yê Akdenîzê Şîrîn Eruncak diyar kir ku wan bi ruhê têkoşînê ya ku Rahşan û Mazlûm dane, Cejna Newrozê pîroz dikin Hevseroka DEM Partiyê ya Mersînê Bedriye Kuş jî di pîrozbahiyê de axivî û Salih Muslim bi bîr anî û got, “Ez kesên ku di vê têkoşînê de jiyana xwe ji dest dane bi rêzdarî bi bîr tînim.”
Di axaftinan de banga beşdarbûna pîrozbahiyên ku wê di 22’yê Adarê de li qada Cejna Newrozê ya Tirmil were lidarxistin, hat kirin.
Pîrozbahî bi stran û gerandina govendê bi dawî bû.
LI XANA AXPARÊ MEŞA BI MEŞALE
Welatiyên li taxa Kela Gabana ya navçeya Xana Axparê ya Amedê tevî barana zêde Newroz pîroz kirin. Rêveberên Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî) ên Xana Axparê, hevşaredarên Xana Axparê û gelek welatî beşdarî pîrozbahiyê bûn. Girse bi meşaleyan heta girê dîrokî yê Mîr Xidir meşiyan. Piştre, li ser girê agir hat pêxistin û bi gerandina govendê Newroz hat pîrozkirin.
DÎLOK
Rêveberên Partiya Wekhevî û Demokrasiyê ya Gelan (DEM Partî) li taxa Gazîkentê bi dirûşmeya “Newroz pîroz be” şahiyek li dar xist. Şahî bi berzkirina “Newroz pîroz be”, “Jin, jiyan, azadî” û “Bijî Serok Apo” û gerandina govendê bi dawî bû.
