Li navçeya Hezroyê ya Amed pîrozbahiya Newrozê hate lidarxistin. Parlamentera DEM Partiyê ya Amedê Adalet Kaya û Hevserokê DEM Partiya Amedê Abbas Şahîn, nûnerên saziyên sivil û gelek welatiyên Hezroyê beşdarî pîrozbahiyê bûn. Li qada pîrozbahiyê agirê Newrozê hate pêxistin û welatiyan govend gerand. Pîrozbahî coşa gel berdewam kir.
Di pîrozbahiyê de parlamentera DEM Partiyê Adalet Kaya axivî û diyar kir ku Newroz ji bo gelê Kurd ne tenê cejnek e, lê sembola berxwedan û îradeya gel e û wiha got: “Newroz ji bo me ne tenê cejnek e; ew vîna gel e, îradeya gel e. Ji bo azadî û aştiyê berxwedaniyeke mezin e. Gelê Kurd bi hezar salan e li derdora agirê Newrozê dicive; ji bo azadiyê, ji bo aştiyeke bi rûmet û ji bo maf û nasnameya xwe.”
Adalet Kaya di berdewamiya axafina xwe de anî ziman ku îsal Newroz bi hêvî û daxwaza azadiyê tê pîrozkirin û got: “Em îsal Newroza Azadiyê pîroz dikin. Bicihanîna azadiya fîzîkî ya birêz Abdullah Ocalan tê wateya avakirina jiyaneke hevpar a ku gel bikarin bi ziman, çand û nasnameya xwe re bi hev re bijîn.”
Adalet Kaya da zanîn ku agirê Newrozê sembola hêvî û azadiyê ye û ev Newroz dikare bibe pêngava jiyaneke bêşîdet û wekhev ji bo gelên herêmê û got: “Bila agirê Newroz3e rêya me ronî bike.”
Piştî axaftinan gel coşek zêde li dora agirê Newrozê govend gerand û dirûşm berz kirin. Paşê pîrozbahî bi dawî bû.
LICÊ
Newroz li navçeya Licê ya Amedê jî hat pîrozkirin. Siyasetmedar û gelek kes beşdarî pîrozbahiyê bûn. Li qada Newrozê, li dora agirê ku hatî vêxistin, bi muzîkê govend hatie girtin. Girseya bi domdarî dirûşmên “Bijî Serok Apo”, “Jin, jiyan, azadî” û “Newroz pîroz be” berz kirin.
Piştî axaftinan, pîrozbahiya Newrozê bi gerandina govendan bi dawî bû.
