Di daxuyaniya artêşê de ev tişt hate gotin: “Balafirên şer ên hêzên hewayî yên Îsraîlê li herêma Beyrûdê fermandarê leşkerî yê asta herî jor a rêxistina terorê Hîzbûllahê û serdarê yekîneya stratejîk Fuad Şukr ji holê rakiriye.”
Berdevkê artêşê Tugamiral Daniel Hagari di daxuyaniyeke cuda ya bi dîmen de, diyar kir ku “Fuad Şukr ji êrîşa şeva Şemiyê ya li bakurê Îsraîlê li ser saheke futbolê çêbûyî û di êrîşê de 12 zarok hatin kuştin, berpirsyar bû”.
Heman çavkaniyê ev tişt jî zêde kir: “Fuad Şukr alîkarê nêz ê lîderê Hîzbûllah Hasan Nasrallah e û di plankirin û rêvebirina êrîş û operasyonan de şêwirmend bû.”
Hagari, Fuad Şukr wiha pênase kir, “Terorîstekî payebilind ku destê wî di xwîna gelek Îsraîliyan û gelek kesên din de hebû”.
Hîzbûllaha Lubnanê sibeha Çarşemê daxuyanî da û piştrast kir ku şefê leşkerî Fuad Şukr şeva berî di avahiya ku êrîşa Îsraîlê li ser hatî kirin de bû û got ku lê belê aqûbeta wî hîna nayê zanîn.
Çavkaniyeke nêzî tevgera Hîzbûllahê şeva Sêşemê daxuyanî da û gotibû ku Fuad Şukr “ji êrîşa Îsraîlê rizgar bûye”.
Wezareta Tenduristiyê ya Lubnanê, li gorî raporeke ne teqez ragihand ku di êrîşê de jinek û du zarok mirin.
Piştî vê êrîşê li Tehranê êrîşî avahiya lîderê siyasî yê Hamasê Îsmaîl Haniyye hate kirin û hate kuştin.
