Fermandariya Giştî ya Hêzên Ewlekariya Hundirîn a Bakur û Rojhilatê Sûriyeyê duh bi daxuyaniyek ragihandibû ku endamê wan Şêrko Mistefa 2’yê Mijdarê li Kobanê di serdegirtina bazirganekî hişbirê de şehîd bibû. Îro jî bi hezaran şêniyên Kantona Firatê şehîd Şêrko Mistefa li goristana Şehîd Dicle oxirkirin.
Piştî wê ji bo 3 şehîdên Hêzên Parastian Gel (HPG) Hêlîn Kobanê, Aze Rojgirav û Cemşîd Elî Esker ên ku di dîrokên cuda de şehîd bûne merasîma bîranînê li Kobanê hate lidar xistin.
Di merasîmê de Hevseroka Desteya Malbatên Şehîdan û Gaziyên şer yên Kantona Firatê Mistefa Êto axivî û anî ziman ku ew bi mîrateya şehîdan gihîştine vê rojê û wiha axivî: “Bi saya şehîdên xwe me li dijî her cure desthilatdarî berxwedanke bêhempa da meşandin. Em niha di pêvajoyek gelek hesas re derbas dibin. Dijminê me roj bi roj bi rêbazên cuda êrîş li hemberî me dike. Divê em jî li hemberî van êrîşan zêdetir xwedî helwest bin û bi hevgirtina civakî re dawî li van êrîşan bînin.”
Rêveberiya Têkoşîna li Dijî Narkotîkê ya Kantona Firatê Roceng Ebas axivî û anî ziman ku ew soz didin ku wê mîrateya hevrêyên xwe bişopînin û got: “Hevalê me Şêrko li her derê bênavber berxwedanek bêhempa meşand. Divê em zêdetir xwedî li fikir û feslefeya Rêberê xwe derkevin. Ger em xwedî li fikrên Rêberê xwe derkevin em ê xwedî li şehîdên xwe jî derkevin. Em weke endamên Rêveberiya li dijî Narkotîkê soz didin ku em ê heta dawiyê xwedî li şehîdên xwe derkevin.”
Di dawiya merasîmê de wesîqeta şehîd hat xwendin û radestî malbata wî hate kirin. Şehîd Şerko bi dirûşme û tililiyan hate oxirkirin.
