Desteya Hundirîn a kantona Cizîrê ya Herêma Bakur û Rojhilatê Sûriyeyê bi daxuyaniyekê diyar kir ku li gundê Kerhûk ê gundewarê bajarê Qamişloyê operasyonek ewlehiyê li dar xist.
Di daxuyaniyê de wiha hate gotin:
“Desteya Hundirîn a Kantona Cizîrê piştrast dike ku Hêzên Ewlekariya Hundirîn duh li gundê Kerhûk (El Faz’a) yê li gundewarê Qamişloyê li dijî komek bazirganên madeyên hişberê yên ku karên diziyê, şantajkirin, revandinê kirine operasyoneke ewlehiyê pêk anîn.
Di dema serdegirtinê de, hêzên me rastî êrişa çekdarî ya endamên komê hatin. Di encamê de pevçûn de çêbû, firoşkarekî hişbirê hat kuştin û 4 jî hatin girtin.
Di dema pevçûnan de, endamên komê zarok û jin wekî mertalên zindî bi kar anîn, ev yek bû sedem ku hêzên me ji bo parastina ewlehiya sivîlan bi awayekî demkî operasyonan rawestînin.
Piştre, şêx û eşîrên herêmê mudaxele kirin û soz da ku 2 kesên mayî ji bo darizandinê radestî Hêzên Ewlekariya Hundirîn bikin.
Di operasyonê de, hejmarek ji erebeyên hatine dizîn û çekên li cem komê hatin desteserkirin.
Desteya Hundirîn a kantona Cezîrê teqez dike ku agahiyên ku li ser hin rûpelên dijber der barê hûrgiliyên operasyonê de hatine belavkirin ne rast in û armanc dikin ku raya giştî şaş bikin.
Hêzên Ewlekariya Hundirîn dê erkê xwe yê şopandina bazirganên madeyên hişberê û her kesê ku ewlehî û aramiya civakê tehdît dike, bi cih bînin, û dê edalet li dijî her kesê ku îspat bibe ku di van kiryaran de beşdar e, were bicîhanîn.”
