Komîteya Koçberên Serêkaniyê îro (23 Cotmeh 2025) têkildarî hilbijartinên “Meclisa Gel” ên ku hikumeta veguhêz a Sûriyeyê li bajarê Serêkaniyê û Girê Spî yên dagirkirî li dar dixe, daxuyaniyek weşand.
Di daxuyaniyê de hate gotin: “Bi navê bi hezaran şêniyên Serêkaniyê yên ji sala 2019’an ji ber êrişên dagirkirinê ji warê xwe hatine koçberkirin, em hilbijartinên ku li desthilata De Facto li bajar pêk tîne, red dikin. Em diyar dikin ku ev hilbijartin ne rewa ne û di aliyê exlaqî û hiqûqî de neheqî ne. Di heman demê de îradeya niştecihên resen ên bajar îfade nakin.”
Di daxuyaniyê de îşaret bi vê yekê hat kirin ku hilbijartin ligel guhertina demografîk a sîstematîk, bêparhiştina bi dehezaran ji şêniyên Serêkaniyê ji mafên xwe yê xwezayê yên vegera li ser warê xwe û pêkanîna bi azad û ewle ya jiyana xwe ya sivîl û siyasî de tên kirin.
Di daxuyaniyê de hate diyarkirin ku ji sedî bi kêmanî 85 niştecihên resen ên Serêkaniyê li herêmên din ên Bakur û Rojhilatê Sûriyeyê koçber in û ji mafên xwe yên vegerê bêpar in. Hate gotin “Lewra ev hilbijartin ne edilane ye.”
Di dewama daxuyaniyê de hate destnîşankirin ku çi hilbijartinên ku ligel dagirkerî û koçberiya bi darê zorê werin kirin, binpêkirina qanûnên mirovî yên navneteweyî û li dijî van peymanên navneteweyî:
– Benda 25’an a taybet a mafên siyasî û sivîl a peymana navneteweyî ya mafên mirovan e ku mafê beşdariya azad a welatiyan di rêvebirina kar û barên giştî de mîsoger dike.
– Li gorî peymanên Cinêvê yên sala 1949’an, qedexe ye desthilata dagirker guhertinên demgorafîk an siyasî li herêmên dagirkirî pêk bîne.
– Li gorî benda 21’an Danezana Cîhanê ya Mafên Mirovan, îradeya gel jêdera desthilata rewa ye.
Di daxuyaniyê de hate desntîşankirin ku çareseriya adilane û yekane ya doza Serêkaniyê pêkanîna Peymana 10’ê Adarê bi taybetî benda girêdayî vegera ewle ya koçberan e.
Di daxuyaniyê de hate gotin, heya ku koçber nikaribin vegerin warên xwe û mafên xwe yên siyasî li ser xaka xwe bi dest nexin, dê encamên van hilbijartinan nûnertiya rasteqîne ya gelê Serêkaniyê nekin û dê ne rewa û ne exlaqî bimînin.
Di dawiya daxuyaniyê de bang li Neteweyên Yekbûyî, rêxistinên navneteweyî û aliyên têkildarî mafên mirovan hat kirin ku berpirsyarên xwe bi cih bînin, nêzîkatiyên nerewa bi dawî bikin, peymanên girêdayî vegera koçberan bişopînin. Hate gotin vegera ewle ya koçberan li ser warên xwe mîsogeriya bingehîn a her çareseriyeke siyasî ya adilane û mayînde ye.
