Hevserokên Giştî yên DEM Partiyê Tulay Hatîmogullari û Tuncer Bakirhan çûn serdana nobeda Dayikên Aştiyê ya ku bi daxwaza Azadiya fîzîkî ya Rêber Apo û gavên şênber ji bo pêvajoya Aştî û Civaka Demokratîk werin avêtin li Parqa Kurtuluşê dane destpêkirin. Di serdanê de Berdevka DEM Partiyê Ayşegul Dogan, Cigirê Hevserokên Giştî yê DEM Partiyê ji Rêveberiyên Herêmî Berpirsyar Mehmet Ruştu Tîryakî, Cigirê Hevserokên Giştî yê DEM Partiyê Mahfuz Guleryuz ê ku ji Rêxistinkirinê Berpirsyar jî cih girtin. Her wiha parlamenterên DEM Partiyê, endam û nûnerên partî û saziyên demokratik jî ji bo piştgiriyê tevlî nobeda dayikan bûn.
Hevserokên Giştî yên DEM Partiyê Tulay Hatîmogullari û Tuncer Bakirhan li cihê nobedê bi Dayikên Aştiyê re daxuyanî dan. Di daxuyaniyê de destpêkê Dayika Aştiyê Zeynep Çalihan axivî, bi lêv kir ku ew ji bo aştiyê hatine li Enqereyê û ji bo serdanê spasiya hevserokan û girseyê kir.
Dayika Aştiyê Nezahat Tekke bi lêv kir ku dewletê gavên pêwîst ji bo pêşketina pêvajoyê neavêtine û wiha got: “Bi salan me êşên mezin kişandin. Em ê li vir ji bo astiyê nobedê bigirin. Em ê serdana partiyên siyasî jî bikin û daxwaza xwe bînin ziman. Hêviya me ew e ku em li vir encamekê bigirin. Girtiyên nexweş û hemû girtî bên berdan. Muzakerevanê serekê yê pêvajoyê Rêberê Gelê Kurd Abdullah Ocalan di girtîgehê de ye. Daxwaza me ya sereke azadiya Serokatî ye. Rêbertî azad bibe her tişt dê çareser bibe.”
Hevseroka Giştî ya DEM Partiyê Tulay Hatîmogullari jî destnîşan kir ku ew jî ji bo daxwazên dayikan bi cih werin dê li parlamentoyê û her derê bitêkoşin û got: “Herî zêde hûn aştiyê heq dikin. Tevî êşan jî we her tim daxwaza aştiyê kir. We got bila tu dayik negirîn. Ji bo êş bi dawî bibin we têkoşîna aştiyê da. Niha jî dixwazin pêvajo bi lez bimeşe û gav bên avêtin, hûn hatin Enqerê. Em ê teqez aştiyê bînin vî welatî. Aştî dê bi qasî laçika we ya spî bi rûmet û pak were vî welatî. Teqez aştî dê bi ser bikeve.”
Hevserokê Giştî yê DEM Partiyê Tuncer Bakirhan jî bang li rayedarên dewletê kir ku daxwazên dayikan bibihîsin û got: “Hûn ji bo karekî pîroz hatine. Em ê jî ji bo daxwaza we têbikoşin. Dayik ji bo êdî dayik negirîn ji gelek bajaran hatin Enqerê. Hemû dayikan êşên mezin kişandin. Dayik ji bo tiştek pîroz hatine. Em soz didin dayikan ji bo ciwan êdî jiyana xwe ji dest nedin, em ê têbikoşin. Ji bo êdî şer nebe û daxwaza we bi cih were em ê têbikoşin. Ez bang li desthilat û partiyên siyasî dikim ku guh bidin çalakiya dayikan. Dayik ji bo êdî şer nebe di nobedê de ne. Aştî ne tenê ji bo Kurdan ji bo hemû kesan pêdiviyek e. Ji bo wê jî ez li ber vê têkoşîna dayikan bejna xwe ditewînim û em ê jî li her derê ji bo van daxwazan têbikoşin.”
Piştî daxuyaniyê Hevserokên Giştî û heyeta bi wan re bi dayikan re li ser nobedê axivîn û gotobêj kirin.
