Zaroka 15 salî ya ku piştî erdheja di 6’ê Sibata 2023’yan de li Mereşê qewimî bi malbata xwe re li Şirnexê bi cih bûbû, di Hezîran-Tîrmeha 2024’an de rastî destdirêjiya parêzvanê li Waliyê Şirnexê û polîsê bi navê Oguzhan Yucesoy ve hat. Piştî ku îfadeya zarok li ber pedagog hat girtin, li dijî Yucesoy bi sûcên “Îstîsmara zayendî ya li dijî zarokan”, “Ji azadiyê bêpar hiştiye” û “Gefa li dijî jinan” doz hat vekirin û ji kar hat dûrxistin. Tevî ku dozgeriyê çar caran daxwaza girtina wî kiriye, sûcdar Yucesoy hîn jî negirtî tê darizandin.
NIMÛNEYÊN DNA’YÊ HEV GIRTIN
Encamên nimûneyên DNA’yê yên ku di 18ê Gulanê de ji Saziya Tiba Edlî (ATK) re şandibûn jî gihîştin dadgehê. Di rapora ATK’ê de hat diyarkirin ku nimûneyên DNA’yê yên ji bersûc û qurbaniyê hatine girtin hev digirin.
Di rapora derbarê nimûneyên ji bersûc hatine girtin de ev tişt hatine gotin: … Hat tespîtkirin ku profîla DNA’ya hejmara 2 ya ku li ser cilên bi merqeya ‘LCW’ hatiye girtin, profîla DNA’ya qurbaniyê bi koda OY-1 û kesê bi navê Oguzhan Yucesoy hev digirin. Profîla DNA’ya Y-STR ku ji nimûneya 2 hatiye girtin û DNA’ya Y-STR a kesê bi navê Oguzhan YUCESOY danîn ber hev. Li gorî daneyên ku hatine bidestxistin; hat tespîtkirin ku profîla DNA’ya Y-STR a kesê bi navê Oguzhan Yucesoy û profîla DNA’ya Y-STR’ê hev digirin.”
Rûniştina doza ku sûcdar Yucesoy jê tê darizandin wê sibê li 3’yemîn Dadgeha Cezayê Giran a Şirnexê were dîtin.
