Kongreya Star a bajarê Qamiloyê yê kantona Cizîra û bajarê Kobanê yê kantona Firatê yên Bakur û Rojhilatê Sûriyeyê bi boneya qetilkirina Jîna Emînî (22) û serhildana “Jin, Jiyan, Azadî” daxuyanî dan.
Daxuyaniya bajarê Qamişloyê li Stada Şehîdên 12’ê Adarê hat dayîn. Ji sazî û dezgehên jin ên bajarê Qamişloyê bi sedan jin beşdarî daxuyaniyê bûn. Jinan stûmalên bi Kurdî û Erebî li ser “Jin, Jiyan, Azadî” hatibû nivîsandin li xwe kirin. Kaxezên li ser nivîsên “Şoreşa keziyan hîn li dar e”, “Jîna Emînî tundiya li ser jinê şikand”, “Bi azadiya jinê, civak azad dibe” û “Bi vîna Jîna, bi israra Jiyan, bi têkoşîna Zeyneb em ê tundiyê tune bikin”, hatibûn nivîsandin, wêneyê Jîna Emînî û Rêber Apo hildan.
Di daxuyaniyê de Berdevka Kongreya Star a bajarê Qamiloyê Rîhan Temo axivî.
Rîhan Temo tevayî şehîdên serhildana “Jin, Jiyan, Azadî” bîr anî, sersaxî ji malbatên wan re xwest, silav ji jin û gelên li ber xwe didin re şand.
Rîhan Temo got: “Em sêyemîn salvegera serhildana jinan û gelan a li hemberî olperestî, nîjadperestî û zayendperestiyê, li hemberî hêzên hegemon, di kesayeta Jîna Emînî de kursiyê melayan hejand, bi bîr tînin. Bejna xwe li hemberî serhildana wan ditewînin.”
Rîhan Temo bal kişand ser mezinbûna serhildana “Jin, Jiyan, Azadî” û wiha axivî: “Vîna ku bi destê jinan destpê kir, bi destê tevayî cîhanê hate hilandin. Raste îro salvegera sêyemîn e, gelek kes û aliyan xwest bi nîjadperestî, zayendperestî û olperesiyê vê berxwedanê biçewisîne.
Daxuyanî bi dirûşma “Jin, Jiyan, Azadî” bi dawî bû.
KOBANÊ
Li Kobanê daxuyanî li Qada Jina Azad hate dayîn.
Daxuyanî bi zimanê Kurdî ji aliyê endama Kongra Star a Kantona Firatê Meysun Kewar ve hat xwendin.
Meysun Kewar bal kişand ser 3’yemîn salvegera Şoreşa ‘Jin Jiyan Azadî’ ya ku li hember hişmendî û pergala qirker a dewleta Îranê hatibû lidarxistin û wiha got: “Ramanên Rêber Apo ji bo me tevahî jinan bû hêza xurtkirina têkoşîna jinan, serxistin û rizgariya hemû jinan.
Çalakiyên ku bi pêşengiya jinan bi hêvî û hêrsê destpê kirin, veguherî serhildana ‘Jin, Jiyan, Azadî’ ku gelê Kurd, Belûc û Ereb jî tê de cih girtin.
Serhildana herî mezin a şoreşgerî ya salên dawî bi felsefeya “Jin Jiyan Azadî” li Îran û Rojhilatê Kurdistanê belav bû. Ne tenê serhildanek li dijî ferzkirina hîcabê bû, di heman demê de ji bo bidestxistina hemû maf û azadiyên siyasî, aborî û civakî yên hemû gelan bû.
Hîna jî çirûskên serhildana ‘Jin, Jiyan, Azadî’ di girtîgehên rejîma faşîst, noker û olperest de olan didin.
Bijî berxwedana jinên rojhilatê kurdistanê,
JIN JYAN AZADÎ.”
