Bi pêşengtiya KNK’ê, Platforma Yekîtiya Jinên Kurd, Nûnertiya Pêşmergeyên Dêrîn û Bereya Piştevaniya bi Rojavayê Kurdistanê re xwepêşandaneke mezin li Silmaniyê lidar xistin û bang li civaka navneteweyî kir ku pêşiya êrişên dagirkeriyê yên li ser Kurdan bidin sekinandin.
Di xwepêşandanê de li ser navê Bereya Piştevaniya bi Rojavayê Kurdistanê re Doxor Cefer Elî peyamek da û got: “Ev êriş armanca wan tinekirina rêveberiya xweser ya Rojavayê Kurdistanê ye. Têkdana aştî û bi hev re jiyanê ye. Em piştevaniya xwe ya ji bo Şêxmeqsûd û Eşrefiyê yên Helebê tînin ziman. Bang li civaka navneteweyî, saziyên mafê mirovan dikin ku bi lezgînî dest bavêjin rewşa li Sûriyeyê û pêşiya qirkirina Kurdan û guherîna demografiyê bigirin.”
Li ser navê KNK’ê Şêrko Heme Emîn axivî û ev peyam da: “Hikûmeta demkî ya Sûriye peymana di navbera wan û QSD’ê îmze kiribû binpê kir. Kurdan ti carî serî li ber kesê ne tewandiye. Şerê li dijî Kurdan tê kirin şerê berjewendiyên siyasî ne. Divê desthilata Şamê û Wezareta Parastinê guh bide bangên aştî û bi hev re jiyanê. Divê rê neyê dayîn ku Heleb bibe qada şerê berjewendiyên siyasî yên dewletên li herêmê.”
Li ser navê Bereya Piştevaniya Bi Rojavayê Kurdistanê re Osman Sêderî peyamek da û got: “Em êrişên Hikûmeta Ehmed Şera ya li ser sivîlan şermezar dikin. Bê cudahî êrişî jin, zarokan tê kirin. Daxwaza me ew e ku demildest ev êriş bisekinin.”
Di peyama Platforma Yekîtiya Jinên Kurdistanê de jî ev hate gotin: “Baweriya me bi ramanê azad û azadîxwaziyê ya gelan heye. Piştgirî û hevsoziya xwe ji bo Rojavayê Kurdistanê destnîşan dikin û li dijî êrişên li ser taxên Kurdan in.”
