Platforma Ked û Demokrasiyê ya Wanê, ji bo şermezarkirina gotinên nijadperest û zayendperest ên li hemberî siyasetmedara Kurd Leyla Zana, li Kolana Hunerê ya Wanê daxuyaniyek da çapemeniyê. Di daxuyaniyê de pankarta “Leyla Zana rûmeta me ye” hate vekirin.
Li ser navê platformê Fîgen Çolakoglu axivî û diyar kir ku qadên werzişê êdî ji armanca xwe ya pêşbaziya werzişî derketine û wiha got: “Tribunên futbolê veguherîne qadên siyasî ku îdeolojiyên nijadperest, şoven, zayendperest û cudaxwaz lê tên hilberandin. Ev rewş encama polîtîkayên înkarê, pratîka bêcezatiyê û zimanê siyasî yê ku cemavweriyê ji hev qut dike ye.”
Çolakoglu bi bîr xist ku alîgirên Bursasporê berê jî bi bûyerên wisa hatine rojevê û di maçên Amedsporê de pankartên “kujerên nediyar” û “windakirinên bi darê zorê” hilgirtine. Çolakoğlu got, “Cardin anîna van sembolan bo tribunan, peyameke siyasî û provokasyoneke eşkere ye.”
Çolakoglu da zanîn ku êrîşa li ser Leyla Zana ne bûyereke serbixwe ye û wiha berdewam kir: “Ev êrîş wekî ‘serhişkiya komek alîgir’ nayê dîtin. Tiştê ku hatiye hedefgirtin; nûnertiya siyasî ya gelê kurd, hebûna jinan a di qada giştî de û vîna aştiyê ye. Ev yek rasterast sûcê nefretê ye.”
Daxuyanî bi çepik û dirûşman bi dawî bû.
LI MANÎSAYÊ DAXUYANIYA HEVPAR
Li Manîsayê jî gelek saziyan, di nav de Komeleya Farqîniyên Amedê û şaxên Kulp-Derê, daxuyaniyeke hevpar dan. Di daxuyaniyê de hate diyarkirin ku pankart û dirûşmên di tribunan de, êrîşên nijadperest in ku zimanê gefê dihewînin.
Di daxuyaniyê de hate destnîşankirin ku divê futbol bibe qadeke civakî ya pêkhêner û bang li Federasyona Futbolê ya Tirkiyeyê (TFF) û meqamên rayedar hate kirin ku pêvajoyên îdarî û dîsîplînê bidin destpêkirin.
Di dawiya daxuyaniyê de hate gotin, “Birêz Leyla Zana ne bi tenê ye” û hate destnîşankirin ku aştiya civakî tenê li ser bingeha wekhevî, azadî û têkoşîna demokratîk ava dibe.
Saziyên ku îmze avêtine daxuyaniyê ev in: Komeleya Farqîniyên Amedê ya Bursayê, şaxên Kulp-Derê yên Stenbol, Antalya, Îzmir, Bursa û Enqereyê, Komeleya Mêrdîniyan ya Bursayê, Komeleya Misircê Kurtalan/Sêrtê a Bursayê û Komeleyên Mûş û Agiriyê yên Bursayê.
