Bavên şehîdan û xelkê Şengalê li dijî êrîşên li ser Bakur û Rojhilatê Sûriyeyê piştgiriya xwe nîşan dan. Welatiyên bi navê Xêro Xidir û Hemed Bişar, ragihandin ku ew amade ne ji bo parastina Rojava canê xwe û zarokên xwe feda bikin.
Bavê şehîd Bawer Xêro Xidir, bal kişand ser wefadariya gelê Rojava ya di dema fermana 2014’an de û wiha got, ’’Weke gelê Şengalê, me tu carî sala 2014’an jibîr nekiriye. Dema ku pêwîstiya me bi alîkariyê hebû, gelê Rojava ji 7 saliya xwe heta 70 saliya xwe ji bo me seferber bûn û me ji qirkirinê rizgar kirin. Îro dor hatiye ser milê me, çi ji destê me were em ê bikin. Heke pêwîst bike, em ê tevî zarokên xwe canê xwe di oxira wan de feda bikin.”
Endamê Rêveberiya Xweser a Şengalê û bavê şehîd Mensûr, Hemed Bişar, jî diyar kir ku ew nikarin başiya Rojava jibîr bikin û wiha domand, “Êrîşên îro, hewildana hildana tola DAÎŞ’ê ye. Ew hêzên wekî YPG/YPJ û QSD’ê ku koka DAÎŞ’ê qelandin, îro careke din rû bi rûyê êrîşan in. Dixwazin tola birayên xwe (DAÎŞ) ji gelê Rojava û hêzên wê yên parastinê hilînin.”
Hemed Bişar got, “Me dixwest ne tenê bi çalakiyan, lê belê bi çekên xwe li kêleka wan şer bikin. Heke dewleta Iraqê deriyên sînor vekiriba, em ê îro li eniyên şer ên Rojava bana. Lê mixabin rêyek me ya din nîne, ji bilî van çalakiyan. Em ê van çalakiyan bi serbilindî bidomînin.”
Di dawiya peyamên xwe de, her du bavên şehîdan anîn ziman ku ew ê heta dilopa xwîna xwe ya dawî fedayê gelê Rojava û zarokên wan bikin.
Ev helwesta Şengaliyan careke din nîşan da ku sînorên di navbera her du aliyan de nikarin pêşiya xwişk-biratî û berxwedana hevpar bigirin.
