Endamê Meclîsa Partiyê ya Partiya Demokrasî û Wekheviyê ya Gelan (DEM Partî) Unal Yûsûfoglû asta heyî ya pêvajoyê, êrîşên li ser DEM Partiyê û polîtîkayên partiya xwe ji ANF’ê re nirxand.
Unal Yûsûfoglû anî ziman ku pêvajo li gel ku ji aliyê Bahçelî ve hate destpêkirin, hîmê pêvajoyê ji aliyê Rêber Apo ve hate danîn û got, “Bahçelî pêvajo da destpêkirin, lê belê yê ku pêşengî ji vî karî re kir, bingeh danî, rê û rêbaz diayr kir, çareseriyên rasteqîn afirand û di nava van çareseriyan de hem rêxistin, hem gelê xwe, hem jî dostên xwe seferber kir Rêber Abdullah Ocalan bi xwe ye.”
Yûsûfoglû destnîşan kir ku banga 27’ê Sibatê divê weke mîladekê bê dîtin û ragihand ku li gorî hin derdoran hem PKK hem jî gelê Kurd wê ev daxuyanî qebûl nekiribûna, lê belê bûyerên ku qewimîn ev bendewarî têk birin. Yûsûfoglû got, “Banga 27’ê Sibatê gelekî girîng bû. Piştî daxuyaniyê muxatab û aliyê esasî yê vî karî PKK’ê daxuyanî ji xwe re kir esas, biryar da ku kongreya xwe ya 12’emîn bicivîne, xwe fesix bike, çekan dîne. Ev yek ji bo Rojhilata Navîn gelekî bi wate bû. Bi dîtina min di vir de tişta herî girîng a ku divê li ser bê rawestîn ew e têkilî û girêdana xurt a tevgear bi pêşengiya Rêber Abdullah Ocalan û realîteya Kurd a hemdem e ku vê tevgerê afirand.
Li gorî gelek derdoran daxuyaniya 27’ê Sibatê wê bersiva xwe nedîtibûya; dihate gotin ‘PKK wê qebûl neke, gelê Kurd wê xwe nêzî vê yekê nek’. Lê belê careke din hate dîtin ku gelê Kurd û Tevgera Azadiyê ya Kurd bi hemû sazî û pêkhateyên xwe li pişt Rêber Abdullah Ocalan sekinî; ragihand ku Rêber Abdullah Ocalan weke îradeya xwe dibîne û ev daxuyaniya Ocalan ji bo xwe weke wezîfeyê dibîne. Ya ku diviyabû bihata kirin jî ew bû ku li gorî daxuyaniyê tevbigere.
Bêguman merasîma şewitandina komek ji gerîlayan a bi pêşengiya Hevseroka Konseya Rêveber a KCK’ê Besê Hozat yek ji gavên girîng ên vê pêvajoyê bû. Di vê mijarê de daxuyaniyên aqlê sazî û rêveberiya PKK’ê jî ji bo birêxistinkirina pêvajoyê û rêveçûna wê girîng bû.
Ji bo avakirina esasê vî karî girîng bû. Her wiha daxuyaniyên Rêber Abdullah Ocalan ji aliyê nîşandana amadekarî, rêxistinî û biryardariya aliyê Kurd a li ser vê mijarê divê gelekî baş bêne fêhmkirin.”
Unal Yûsûfoglû di dewama axaftina xwe de anî ziman ku divê rola DEM Partiyê ya di vê pêvajoyê de rast bê fêhmkirin û diyar kir ku nêrînên xwe yên têkildarî pirsgirêka Kurd zelal e, lê belê muxatabê sereke Rêber Apo û PKK ye. Yûsûfoglû li ser mijarê axaftina xwe bi vî rengî dewam kir:
“Em vê yekê bibêjin: Demên berê -Ji Agirbesta 93’an heta bi pêvajoya Osloyê, heta pêvajoyên çareseriyê yên 2013-2015’an- her serdem xwedî taybetmendiyên xweser in. Di her demê de êş û zehmetî hebûn, yên vê demê jî hene. Beriya her tiştî divê rola DEM Partiyê ya di vê mijarê de baş bê pênasekirin. Di mijara çareseriya demokratîk û aştiyane ya pirsgirêka Kurd de refê DEM Partiyê zelal e. DEM Partî li aliyê çareseriyê ye. DEM Partî di pêvajoyên aştî û danûstandinê de her tim bi rola xwe radibe.
Ji xwe hincetên avabûnê yên DEM Partî û HDK’ê diyar in: Ji ber ku baweriya xwe bi jiyana bi hev re ya gelên Tirkiyeyê, bi avakirina paşeroja hevpar û xwişk û biratiyê tîne ev partî û kongre ava bûn. Lewma DEM Partî wê di vê pêvajoya danûstandinan de berpirsyariya xwe bi cih bîne; lê belê DEM Partî di pirsgirêka Kurd de muxatabê sereke nîne. Divê ev yek bê fêhmkirin.
Muxatabê esasî Rêber Abdullah Ocalan û PKK ye. DEM Partî di hemû daxuyaniyan û pêşniyarên xwe de bi eşkere nîşan da ku muxatab kî ye. Dema ku pêvajoya çareseriyê hate betalkirin û şerê kaotîk destpê kir jî DEM Partiyê tenê tiştek pêşniyar kir: Bila tecrîda li Îmraliyê bê rakirin, hevdîtin bi Birêz Abdullah Ocalan re bê kirin; ji ber ku muxatabê pirsgirêka Kurd Birêz Abdullah Ocalan e, lewma her daxuyaniya ku Abdullah Ocalan bide, wê deriyê aştiyê veke.
Di vir de wezîfeya sereke ya DEM Partiyê ew e ku fikrên Rêber Abdullah Ocalan ên ji bo aştiya Tirkiyeyê binirxîne, vê yekê bigihîne gel, bigihîne hemû dînamîkên Tirkiyeyê û bigihîne paşerojê. Lewma DEM Partî bi rola xwe zane; bi sînorê xwe zane, bi pîvanên xwe zane û li gorî vê siyasetê dimeşîne.
DEM Partî neçar e ku weke partiya muxalefeta bingehîn a li Tirkiyeyê partiyên din ên muxalefetê, derdorên çep û sosyalîst, qada kedê, rêxistinên girseyî yên demokratîk, komeleyên xwecihî, avaniyên jin û ciwanan, akademî û çapemeniyê tevlî pêvajoyê bike. Rola xwe ev e: Banga civaka demokratîk û projeya wê bigihîne van hemû beşan û wan bike parçeyek ji vê pêvajoyê.”
