Çalakiyên xizmên girtiyan û Dayikên Aşiyê ji bo azadiya fîzîkî ya Rêberê Gelê Kurd Abdullah Ocalan li gelek bajaran dane destpêkirin, dewam dikin.
EDENE
Nobetê Edaletê ya bi pêşengtiya Komeleya Piştevaniya bi Malbatên Girtî û Hikûmxwaran re ya Akdenîz Edeneyê (AATUHAY-DER) hatiye destpêkirin di roja 58’emîn de berdewam dike. Ji ber ku Dayikên Aştiyê îro çûbûn Enqereyê, çalakiya îro ji hêla rêxistina DEM Partiyê ya navçeya Seyhanê ve hate dewrgirtin. Di çalakiyê de dirûşma “Bijî berxwedana zindanan” hate berzkirin û azadiya Abdullah Ocalan û hemû girtiyan hate xwestin.
WAN
Nobeta Edaletê ya ku bi pêşengtiya xizmên girtiyan û Komeleya Piştevaniya bi Malbatên Girtî û Hikûmxwaran re ya Wanê (WAN TUHAY-DER) li avahiyê rêxistina Partiya Herêmên Demokratîk (DBP) a Wanê hatiye destpêkirin di roja 57’an de dom kir. Parlamentera Wanê ya Partiya Wekhevî û Demokrasiyê ya Gelan (DEM Partî) Gulderen Varli, rêveberên rêxistina navçeya Ebexê, şêniyên Taxa Xaçortê, Dayikên Aştiyê û gelek kes hatin serdana çalakgeran.
Di serdanê de ji rêvebarên DEM Partiyê ya navçeya Ebexê Pinar Demîr axivî. Demîr, destnîşan kir ku tecrîd sûcê li dijî mirovahiyê ye û wiha got: “Em ê bi hev re têbikoşin û vî sûcî ji holê rakin. Em ê heya dawiyê piştgiriyê didin berxwedana girtîgehan. Em hemû rêhevalên xwe, bi rêzdarî silav dikin.” Piştre jî Dayika Aştiyê Ayten Salgir anî ziman ku heya daxwazên girtiyan werin cih ew ê têkoşîna xwe bidomînin û ev tişt anî ziman: “Em dixwazin bi awayeke demildest polîtîkayên li dijî Ocalan tên meşandin, bi dawî bibin. Em dixwazin bi birêz Ocalan re hevdîtin werin destpêkirin. Em naxwazin zarokên me di girtîgehan de jiyana xwe ji dest bidin. Divê gelê kurd xwedî li vê têkoşînê derbikeve. Em bi hev re rabin ser piya û xwedî li vê çalakiyê derbikevin. Em naxwazin ji girtîgehan darbest derbikevin. Em bang li desthilata AKP û MHP’ê dikin; demildest daxwazên girtiyan bînib cih.”
Nobet bi berzkirina “Bijî berxwedana zindanan” dom kir.
AMED
Nobeta Edaletê ya ku xizmên girtiyan li Amedê daye destpêkirin di roja 57’an de berdewam dike. Nobet, li avahiya DEM Partiyê ya Rezanê tê domandin û li eywana çalakiyê pankarta “Ji dayikên lehengan hezar silav ji bo zindanan. Em ê bi hêza xwe tecrîdê bişikînin û jiyana azad ava bikin” hatibû daliqandin. Çalakvanan pêşmalkên bi nivîsa “Tecrîd sûcê li dijî mirovahiyê ye” li xwe kirin.
Rêveberên DEM Partiyê yên Hênê û namzetên şaredariyê hatin serdana nobetê. Di ziyaretê de çalakvanan bal kişandin ser tecrîda li Îmraliyê û xwestin her kes ji bo azadiya Abdullah Ocalan dengê xwe derxîne.
Çalakî bi dirûşmên “Bijî berxwedana zindanan” û “Jin, jiyan, azadî” bi dawî bû.
MÊRSÎN
Çalakiya Nobeta Edaletê ya ku bi pêşengtiya Komeleya Piştevaniya bi Malbatên Girtî û Hikûmxwaran re ya Çuukurovayê (Çukurova TUAY-DER) hatiye destpêkirin jî di roja 58’an de li avahiya komeleyê berdewam kir. Parlamenterê DEM Partiyê yê Mêrsînê Alî Bozan, namzetên hevşaredariyê yên DEM Partiyê yên Akdenîzê Hoşyar Sariyildiz û Nûriya Arslan, endam û rêveberên partiyê û gelek welatî hatin serdana çalakiyê.
Di çalakiyê de gelek caran dirûşmên “Bijî berxwedana zindanan” û “Jin, jiyan, azadî” hatin berzkirin. Hunermend Ramazan Eren jî di çalakiyê de stran got.
MÊRDÎN
Çalakiya Nobeta Edaletê ya ku li avahiya Rêxistina DBP’a Mêrdînê hatiye destpêkirin didome. Parlamentera DEM Partiyê ya Mêrdînê Bêrîtan Guneş û gelek welatî hatin serdanê. Çalakî bi stran û çepikan dom kir. Guneş, di çalakiyê de anî ziman ku tecrîd ne tenê li ser gelê kurd lê li dijî tevahiya gelên Tirkiyeyê ye. Bi domdarî Guneş diyar kir ku mîna komploya navneteweyî ya li dijî Abdullah Ocalan, berxwedana li dijî komployê jî kûrewî bûye û ev tişt anî ziman: “Paradîgmaya Abdullah Ocalan li tevahiya cîhanê belav bû. Çawa ku Rojava îro ji bo cîhanê hêvî be, ev paradîgma jî bû hêvî. Divê em kurd û dostên me jî li dijî komployê têkoşîna xwe bidomînin.”
Ji çalakvanên Nobeta Edaletê Dayika Aştiyê Gurbet Tekîn jî greva birçîbûnê ya li girtîgehan silav kir û wiha got: “Bi taybet jî ji bo tecrîda li ser Rêbertiyê bê rakirin em piştgiriyê didin zarokên xwe. Rakirina tecrîdê ne besî me ye. Her kolan di bin tecrîdê de ye. Tecrîd li her deverê belav bûye. Lewma em daxwaza azadiya fîzîkî ya Rêberiya xwe dikin. Em dixwazin Rêbertiyê di nava civaka xwe de bibînin.”
Nobeta Edaletê bi çepik û dirûşman berdewam kir.
STENBOL
Çalakiya ku li Stenbolê bi pêşengiya Komeleya Alîkarî û Piştevaniya Malbatên Girtî û Hikûmxwaran a Marmarayê (MATUHAY-DER) li avahiya Rêxistina Navçeya Esenyurtê ya DEM Partiyê di roja 48’an de berdewam kir. Di çalakiyê de rêveberên Komeleya Alîkarî û Piştevaniya bi Malbatên Xizmên xwe Windakirine (ANYAKAYDER), Hevserokê DEM Partiyê yê Stenbolê Mûrat Kalmaz, rêveberên DEM Partiyê yên Avcilar û Gazîosmanpaşa, endamên Komîsyona Hiqûqê ya Rêxistina Navçeya Avcilarê û gelek kes hatin serdana çalakiyê.
Di serdanê de Hevserokê Herêmê Mûrat Kalmaz axivî û wiha got: “Pêwîste pirsgirêka Kurd bê çareserkirin. Di pêvajoya çareseriyê de bi saya Abdullah Ocalan rê hat kişandin. Ji bo vê jî pêwîste birêz Ocalan dîsa rola xwe bilîze. Pêwîste tavilê dengê Abdullah Ocalan bê bihîstin û azadiya wî ya fîzîkî bê misogerkirin. Em ê vê Nobeta Edaletê ya bi pêşengiya dayikan hatiye destpêkirin heta dawiyê bidomînin û heta ku em bigihêjin armanca xwe têbikoşin. Ez di wê baweriyê de me ku wê hemû gel werin cem hev û aştiyê pêk bînin. Serkeftin wê ya gelan be.”
Yek ji xizmên girtiyan Fînce Akman jî ev tişt anî ziman: “Dewlet ji ber ku ji gelê Kurd ditirse her tim li pey me ye. Ji ber vê yekê divê em piştgiriyê bidin Abdullah Ocalan ku jiyana xwe ji bo gelê Kurd feda kiriye. Divê em zarokên xwe biparêzin. Divê em destê wî bigirin û bînin nav xwe. Divê CPT çavên xwe negire û dawî li vê bêhiqûqiyê bîne. Pêwîste dewlet bi Abdullah Ocalan re hevdîtinê bike. Ji ber ku mifteya çareseriyê li Îmraliyê ye.”
Ji Komîsyona Hiqûqê ya Rêxistina Navçeya Avcilarê ya DEM Partiyê parêzer Emrah Îlarslan jî diyar kir ku divê bi Îmraliyê re diyalog bê kirin û got, “Demokrasî di hiqûqê de xwe îfade dike. Dewleta hiqûqê sîstemeke ku mafên mirovan diparêze, maf û azadiyan diparêze û pêş dixe. Her kesê ku alîgirê aştiyê ye, pêwîste piştgiriyê bidin vê çalakiyê.”
