Li navçeya Bazîdê ya Agiriyê bi beşdariya bi hezaran kesan û bi dirûşma “Rêbertiya Azad Civaka Demokratîk” Newroz hate pîrozkirin. Beriya pîrozbahiyê, bi beşdariya sedan kesan bi meşale û pankarta “Rêbertiya Azad Civaka Demokratîk” heta qada pîrozbahiyê meş hat lidarxistin. Di meşê de gelek caran dirûşmên “Bijî Serok Apo”, “Jin, jiyan, azadî” û “Newroz Ppîroz be” hatin berzkirin. Her wiha bi hezaran kesan ji saetên zû yên serê sibehê ve berê xwe dan qada Newrozê. Welatiyên ku cil û bergên Kurdî li xwe kiribûn, dirûşma “Bijî Serok Apo” berz kir. Di pîrozbahiyê de flamayên bi rengên kesk, sor û zer hatin hilgirtin. Welatiyan demekî dirêj li ber stranan govend gerandin.
Pîrozbahî, bi rêzgirtinê dest pê kir. Piştre jî Wekîlê DEM Partiyê yê Agiriyê Sirri Sakik axivî û got ku divê Rêberê Gelê Kurd Abdullah Ocalan ji hêla fîzîkî ve azad bibe. Sakik, got: “Em di wê baweriyê de ne ku dê di demeke nêz de azad bibin. Divê îktîdara AKP’ê tavilê paqijiyeke biharê bike. Divê bi hezaran girtiyên nexweş yekser bên berdan, polîtîkaya qeyûman bê bidawîkirin û hemû girtiyên siyasî bên berdan. Banga me ji bo îktîdara AKP’ê û hemû derdoran e, werin em bi hev re aştî û demokrasiyê cîbicî bikin. Em hem ji bo muzakereyan hem jî ji bo têkoşînê amade ne.”
Zekiya Îlbasan a TJA’yî jî girîngiya Newrozê vegot û ev tişt anî ziman: “Heta ku pêvajoya Rêberê Gelê Kurd Abdullah Ocalan daye destpêkirin bi serkeftinê tacîdar dibe divê em rêxistinî û têkoşîna xwe mezin bikin. Pirsgirêkeke mezin a netewe dewletan ava kirin heye. Tekane rizgariya ji vê krîzê jî paradîgmaya Rêber Ocalan e. Lewma divê em pêşengtiya pêvajoyê bikin û bi paradîgmaya birêz Ocalan civaka demokratîk û jiyaneke azad ava bikin.”
Hevseroka Giştî ya DBP’ê Çîgdem Kiliçgun Uçar jî anî ziman ku bi hezaran sala ye agirê Newrozê venemiriye û wiha domand: “Mazlum Dogan, Rahşan, Zekiye û keça Araratê Sema Yuceyan ev ronahî diyarî me kirin. Herî zêde Serhedê serî li ber polîtîkayên zilmê yên piştî Plana Islehkirina Şerqê rakir. Tevî pişaftinê jî ev 100 sal in di 8’ê Adarê û Newrozan de tê gel hev.
Girîng e ku di vê pêvajoya nû ya çareseriya demokratîk a pirsgirêka Kurd de herî zêde li ser birêz Ocalan û peyama wî tê axaftin. Divê herî zêde gelê Serhedê xwedî li vê bangê derkeve. Bi mehan gotin ‘Bila birêz Ocalan bang bike.’ Birêz Ocacalan jî bi cisareteke mezin bangekî ku hevkêşeya siyasetê serûbin dike kir. hemû dinya li ser vê bangê diaxive lê îktîdar gavan naavêje.
Di meseleyek wiha dîrokî de hewceye gavên tên avêtin hevdu bihêz bikin. Îktîdar her tim gotina nabeyê bi kar tîne. An em ê di vê sedsala nû de pirsgirêka Kurd çareser bikin û nirxên demokratîk biafirînin, an jî dê Kurd û Tirk bi hev re bi vê pergala zilmê re bijîn. Aştiyeke mayinde û naskirina nasnameyan ma dê zirarê bide kê? Divê îktîdara ku di çareseriya pirsgirêka Kurd de qala aştiya navxweyî dike, divê gavan biavêje. Nabe ku di mijareke wiha giran de gotina nabeyê were bikaranîn. Li hêla din em qebûl nakin ku birêz Ocalan ku aktoreke dîrokî ye, di Girtîgeha Îmraliyê de be. Divê ji hêla fîzîkî ve azad bibe. Digotin dê bi plana têkbirinê Kurdan bieciqînin û derbas bibin. Qeyûm tayîn kirin, tecrîd girantir kirin. Lê Kurdistan qet bêdeng nebû û nabe jî. Ev îktîdar, Kurdistanê weke laboratuarê bi kar tîne. Me got ‘heke pêşî li ber polîtîkayên zilmê yên li Kurdistanê neyê girtin dê li her derê belav bibe.’ Vaye tiştên îro li Stenbolê diqewimin hûn jî dibînin. Derbe li vîna gel kirin.”
Piştî axaftinan, agirê Newrozê hate vêxistin. Bi geşbûna agirê Newrozê û stranên hunermendan re coşa qadê derket lûtkeyê. Bi hezaran kesan li ber stranan govend gerandin û dirûşm berz kirin.
