Li navçeya Erxenî ya Amedê û li navçeya Hezo ya Êlihê Newroz bi coş hate pîrozkirin.
ERXENÎ
Newroz li Erxeniyê li Qada Otogar a Kevn bi beşdariya bi sedan kesî hate pîrozkirin.
Jin bi rengê kesk, sor û zer tevlî pîrozbahiyê bûn û li ber dahol û zirneyê govend hate gerandin.
Hevserokê Kongreya Civaka Demokratîk (KCD) Berdan ozturk li pîrozbahiyê axivî û anî ziman ku ew di pêvajoyeke dîrokî de ne. Ozturk ji bo banga Rêber Apo got, ‘Firsendeke dîrokî ye’ û komkujiya li Kobanê bi tundî şermezar kir.
LI GEL ÇETEYÊN XWE JI SÛRIYEYÊ DERKEVIN
Ozturk got, “Em vê qirkirinê şermezar dikin. Ti karekî wan li Sûriyeyê nîne. Li vê derê pêvajo heye, hûn vê yekê sabote dikin. Hûn li gundê Kobanê komkujiyê dikin. Ev nayê qebûlkirin. Li gel çeteyên xwe êdî ji Sûriyeyê derkevin.”
Ozturk ragihand ku dewleta Tirk ti carî nikare ji zilma li hemberî Kurdan encamê bi dest bixe.
Parlamentera Amedê ya DEM Partiyê Adalet Kaya jî got, “Em ê erk û wezîfeya xwe bi cih bînin. Em ê bi hev re bi meclîsan, bi komunan civaka demokratîk ava bikin.”
Piştî axaftinan agirê Newrozê hate dadan. Pîrozbahî bi stranên Hozan Servan û govenda li ber stranên wî bi dawî bû.
ÊLIH
Li navçeya Hezo ya Êlihê jî pîrozbahî li qada li pêşberî Kolana Diyarbakirê hate lidarxistin.
Li gel Parlamentera Êlihê ya DEM Partiyê Zeynep Odûncû gelek kes tevlî pîrozbahiyê bûn.
Hevseroka Êlihê ya DEM Partiyê Songul Korkmaz anî ziman ku divê ew li pişt peyama Rêber Apo bin û got, “Jin divê peyama Birêz Ocalan mal bi mal ji gel re vebêje. Em zanin ku mifteya çareseriyê ji aliyê Birêz Ocalan ve hatiye destnîşankirin.”
Zeynep Odûncû jî nerazîbûn nîşanî êrîşan da û got, “Vî şerî bisekinînin, bila komkujî nebe. Bila aştî bê çar parçeyên Kurdistanê û Tirkiyeyê, bila yekîtî pêk were. Ji ber vê yekê me navê azadiyê li Newroza 2025’an kir. Em daxwaza azadiyê dikin. Ji ber vê yekê divê guh bidin dengê ji Îmraliyê.”
Piştre agirê Newrozê hate dadan û govend hate gerandin.
