Cejna Newrozê bi pêşengiya Rêveberiya Xweser a Şengalê, li Baxçê Serokatî ya Geliyê Kersê hat pîrozkirin.
Pîrozbahî bi deqeyek rêzgirtina ji bo şehîdên têkoşîna azadiyê û Êzidxanê destpê kir. Piştî rêzgirtinê, Koma Hêviyên Jiyanê şanoyek li ser berxwedana li dijî zilma Dehak’an list û dayîkên şehîdan agirê Newrozê yê Şengalê pêxistin.
Destpêkê peyama Rêber Apo ya ji bo Newrozê hate xwendin û nirxandinên wî yên li ser Newrozê hat guhdarkirin.
Piştî peyama Rêber Apo, Hevseroka MXDŞ’ê Cîhan Celo têkildarî wateya rojê axivî û destpêkê Newrozê li Rêber Apo, şehîdan, gerîla-şervan, tevahiya gelê Kurd, civaka Êzidî û hemû gelên Şengalê pîroz kir.
Cîhan Celo da zanîn tevî hemû hewldanên qirkirinê jî, ew niha li ser çiyayê Şengalê agirê Newrozê bi peyama Rêber Apo geş dikin û wiha axivî: ‘‘Em bi peyama Rêber Apo û geşkirina agirê Newrozê bersiva qirkeran didin. Weke civaka Êzidî û Ereb piştgiriyê didin peyamên Rêber Apo. Rêber Apo bi rêya vê peyamê dixwaze ew çeka ku dijmin me pê qir dike, ji dest bigire. Em civakek aştîxwazin, lewma divê em ji herkesê zêdetir xwedî li van peyamên Rêber Apo derbikevin û vê pêvajoyê bigihînin azadiya fizîkî ya Rêber Apo.’’
Piştî axaftina Cîhan Celo Koma Dengbêjên Şengalê derketin ser dikê û stranên gelêrî gotin. Koma Stranê ya ‘Hêviyên Şengalê’ ya Navenda Stiya Nexşa, Amir Qîranî û hunermend Serdar Azad yê ji derve hatibû vexwendin derketin ser dike.
Girseya Gel heya van kêliyan jî li ber stranan govenda Newrozê li Geliyê Kersê bi awayeke bi coş digerînin.
Ciwanên Şengalê jî wê îşev saet di 20.00’an de ji lofên Şengalê heya Şehîdgeha Şehîd Berxwedan-Şehîd Dilgeş meşeke meşaleyî li dar bixin.
