Hate ragihandin ku di êrişan de yên 11-13’ê Nîsanê ji aliyê hêza paramîlîter Hêzên Piştevaniya Lezgîn (HPL) ve hate kirin, bûyerên komkujî, kuştina bi komî, êşkence, revandin û destdirêjî rû dan.
Li gorî rapora ku li Cenevreyê hate weşandin, ji sivîlên hatin kuştin 319 ji wan bêdaraz hatin înfazkirin, beşek ji qurbaniyan li mala xwe, beşek li bazarê, dibistanê, navendên tenduristiyê û mizgeftan hatin kuştin. Piştî êrişan nêzî 400 hezar kes neçar man ji kampê birevin.
Di daxuyaniyê de hate ragihandin ku di navbera 11’ê Nîsanê û 20’ê Gulanê de 75 jê jin, 26 jê zarokên keç herî kêm 104 kes rastî destavêtin, destdirêjî, koletiya zayendî, destavêtina komî hatin. OHCHR’ê diyar kir ku beriya êrişa HPL li kampê xurek, av û sotemenî hate astengkirin.
Komîserê Bilind Volker Turk ji bo hesabpirsîna ji kujeran û tazmînkirina mexdûran bang kir.
Zamzam yek ji sê kampên mezin ên li derdora El Feşirê ye. Piraniya sivîlên ji bajêr reviyan xwe li Tawilayê girtin; li vê derê nêzî 650 hezar kes hene ku ji cih û warê xwe bûne. Li Sûdanê ji Nîsana 2023’an û vir ve şerekî navxweyî heye. Ji ber vî şerî bi deh hezaran mirov mirin, bi milyonan mirov ji cih û warê xwe bûn. Li gorî Neteweyên Yekbûyî ev şer bû sedema rûdana krîza herî giran a mirovî ya li cîhanê.
