Hevseroka Giştî ya DEM Partiyê Tulay Hatîmogûllari û nûnerên pêkhateyên DEM Partiyê piştî civîna xwe, civîneke çapemenyê li dar xistin.
Civîn li Navenda Giştî a DEM Partiyê hate lidarxistin. Hevseroka Giştî ya DEM Partiyê Tulay Hatîmogûllari got: ‘’Me dubara bi hev re banga Birêz Abdullah Ocalan ya ‘’Aşitî û Civaka Demokratîk’’ nirxand.’’
Tulay Hatîmogûllari ev yek anîn ziman: ‘’Em bi berfirehî li ser berpirsiyariyên vê pêvajoyê sekinîn. Em di wê baweriyê de ne ku bi vê pêvajoyê dê hemû pirsgirêkên civakê werin çareserkirin. Weke ku Birêz Ocalan jî anî ziman bi vê bangê hem dê pirsgirêka Kurd bi rêyên demokratîk were çareserkirin hem jî dê ji bo welatiyên li Tirkiyeyê deriyên jiyaneke demokratîk û xwe dispêre rêgezên hiqûqî vebe. Em di wê baweriyê de ne ku dê bi vê bangê Komareke Demokratîk were avakirin. Me di cîvîna xwe de ev yek dubare bi berfirehî nirxandin.’’
PARTIYA ÇEPGIRÊN KESK: EM PIŞTGIRIYÊ DIDIN HEVDÎTINÊN AŞITIYÊ
Hevberdevka Partiya Çepgirên Kesk Dîdem Goçer diyar kir ku ew piştgiriyê didin hevdîtinên aşitiyê û got: ‘’Tovên aşitiyê ketine axê; bişkîvîn û şînbûna wan girêdayî me ye. Dibe ku ev tov ji Rojhilata Navîn re bibin hêvî û dê hemû cîhanê ronî bikin. Werin em bi hev re aşitiyê pêk bînin.’’
ESP: DIVÊ ÇÎNA KARKERAN RASTERAST BIBE PERÇEYEKÎ PÊVAJOYÊ
Hevserokê Giştî yê Partiya Sosyalîstên Bindest (ESP) Mûrat Çepnî jî diyar kir ku pêvajoyeke girîng pêş dikeve û got: ‘’Destkeftiyên demokratîk bi têkoşînê tên bidesxistin û di vê pêvajoyê de di perspektîfa Birêz Ocalan de jî tiştên ku divê di têkoşîna adilane, birûmet û aşitiyê werin kirin hene. Beriya her tiştî divê êrîşên li ser hêzên demokratîk û azadîxwaz tavilê werin sekinandin. Divê tavilê êrîşên li ser Kobanê û dibin sedema kuştina zarokan werin sekinandin. Em ji vir bang li çîna karkarên li Tirkiyeyê dikin; perçe û muxabatên sereke yên vê pirsgirêkê çîna karkerên li Tirkiyeyê ye. Divê çîna karkerên li Tirkiyeyê rasterast bibe perçeyekî vê pêvajoyê û bibin pêşengên pêvajoya aşitiya adilane û birûmet. Têkoşîna aşitî, demokrasî û azadiyê nesekiniye, nasekine û nikarin bidin sekinandin jî. Em bang li her kesî dikin ku ji bo mezinkirina têkoşînê li ber xwe bidin.’’
SODAP: NABE KU HEMÛ BAR LI SER MILÊN GELÊ KURD BE
Berdevka SODAP’ê Kezban Konûkçû diyar kir ku ew jî piştgiriyê didin pêvajoya Aşitî û Civaka Demokratîk û ev yek anîn ziman: ‘’Nabe ku barê çareseriya pirsgirêka Kurd a sed salî bi tenê li ser milên gelê Kurd be. Pirsgirêka Kurd û pirsgirêkên din bi hev ve girêdayî ne. Ji bo avakirina civaka demokratîk em hemû bi hev re têbikoşin û hêzê bidin vê pêvajoyê.’’
SYKP: EM Ê ERKA XWE BI CIH BÎNIN
Hevserokê Giştî yê SYKP’ê Mertcan Tîtîz got: ‘’Em jî weke sosyalîst û şoreşgerên Tirkiyeyî, ji bo mayîndebûna aşitiyê û pêkhatina wê û demokratîkbûyîna Tirkiyeyê, em ê erk û berpirsiyariyên xwe bi cih bînin.’’
PARTIYA ŞOREŞGER: EM Ê DI NAVA VÎ ŞERÎ DE BIN
Seroka Giştî ya Partiya Şoreşger Elîf Torûn diyar kir ku hemû geşedanên ku dê piştî banga Rêber Apo rû bidin, dê weke pêngavên yekem bin û û got: ‘’Em di wê baweriyê de ne ji bo gelan geşedanên erênî rû bidin. Em weke pêkhateyên DEM Partiyê, em ê di nava vî têkoşîn û şerî de bin. Cihgirtina me ya di nava pêvajoyê de, ji bo azadiya hemû gelan gelekî girîng e.’’
DBP: DIVÊ BANG BI TENÊ NEYÊ HIŞTIN
Hevseroka Giştî ya DBP’ê Çîgdem Kiliçgun Ûçar destnîşan kir ku divê li pêvajoyê xwedî bê derketin û ev yek anîn ziman: ‘’Di vê bangê de banga avakirina Tirkiyeya demokratîk a bi hev re heye. ji ber vê yekê divê ev bang bi tenê neyê hiştin. Divê demildest ji bo Birêz Ocalan mafê hêviyê were naskirin. Çareseriya pirsgirêka Kurd gelekî girîng e û divê her kes erk û berpirsiyariyên xwe bi cîh bîne. Em weke DEM Partî û pêkhateyên wê amade ne ku hemû berpirsiyariyên vê pêvajoyê bi cih bînin û bang li her kesî dikin ku xwedî li vê pêvajoyê derkevin.’’
