Pirsgirêka nasnameyê ya Kurdan a li Sûriyeyê ku nêzî sed sal e dewam dike, piştî Peymana 29’ê Çileyê careke din kete rojeva welêt.
Di çarçoveya peymanê de di sernavên entegrasyona îdarî û leşkerî de kiryareke xurt li qadê xuya nake. Pêvajoya qeydkirina nifûsê û nasnameyan weke qada sereke li pêş e, ku bi lez bi pêş ve diçe.
Bi 5’ê Nîsanê re li navendên ku li Hesekê, Qamişlo, Dêrik, Dirbêsiyê û Girkê Legê hatin avakirin, serlêdanên ji bo nasnameyê bê navber dewam dikin. Li gorî agahiyên ji Midûrê Giştî yê Karên Sivîl ê Walîtiya Hesekê Aziz Al-Muhaimid hatin wergirtin, neh hezar kesên ku berê qeyda wan hebû lê nekarî nasnameyê werbigirin, serlêdan kirin.
Lê belê pêşveçûna bi heman lezê, di dosyayên entegrasyona îdarî û leşkerî de nayê dîtin. Pêvajo ji aliyekî ve bi pêş ve diçe, lê li aliyê din hesasiyeta xwe dewam dike.
LI XETA REQA-TEBQA-IDLIBÊ TÊKOŞÎNA OTORÎTEYÊ KÛR DIBE
Li bakurê Sûriyeyê jî hefteya dawî ji Reqayê heta bi Tebqayê, ji wir jî heta bi Idlibê li xeteke berfireh di navbera eşîran û hikumeta Şamê ya demkî de tansiyon bilind bûye.
Li van herêman ku bandora komên HTŞ’ê (Heyet Tehrîr el Şam) zêde dibe, gelek eşîr karmend û personelên ku ji aliyê van koman ve têne tayînkirin qebûl nakin.
Wekî din, mal û zeviyên hin eşîrên Ereb ji aliyê rayedarên dewletê ve hatin desteserkirin ku vê yekê rageşî hîn mezin kiriye. Tê dîtin, protestoyên li herêmê ne tenê îtirazeke herêmî ye, di heman demê de nîşaneya têkoşîna otorîteyê ya li qadê ye.
Tabloya ku derketiye holê radixe pêş çavan ku pêvajoya entegrasyonê ne tenê li ser xeta Rojava-Şamê, her wiha li sêgoşeya eşîrên Ereb, HTŞ û Hikumeta Demkî de li ser zemîneke li ber şikestinê dimeşe.
EŞÎRA ŞEMMER JI BO HEVSENGIYÊ ROLEKE DIYARKER DILÎZE
Yek ji eşîrên herî bi bandor ên li Sûriyeyê Şemmer û hêzên Senadit ên ser bi wê ve, weke yek ji aktorên herî stratejîk ên pêvajoya entegrasyonê tê dîtin.
Fermandarê Hêzên Sûriyeya Demokratîk (QSD) Mazlûm Ebdî û Berpirsyara Têkiliyên Derve ya Rêveberiya Xweser Îlham Ehmed bi nûnerên eşîra Şemmer re hevdîtin kirin. Parastina aştiya navxweyî û yekgirtina civakî ya li herêmê xalên bingehîn ên rojeva hevdîtinê bûn.
Hêzên Senaditê berê di bin sîwana QSD’ê de bû, lewma nîqaşên li ser bicihbûna vê hêzê ya paşerojê dewam dikin. Her wiha yek ji wan rêyan jî ew e ku ev avanî weke hêzeke ser bi Tumena 60’emîn bê bicihkirin.
Eşîra Şemmer ku li Rojava xwedî avaniyeke berfireh a civakî ye, ji aliyê hevsengiya têkiliyên Kurd-Ereb û pêkanîna aştiya herêmî de roleke diyarker dilîze. Tê gotin, paşeroja pêvajoya entegrasyonê wê bi pozîsyona vê eşîrê diyar bibe.
