Eren Yıldız ê ku di Girtîgeha Girtî ya Tîpa S a Antalyayê de dihat girtin, piştî girtina 30 sal û 7 mehî hat berdan. Yıldız piştî berdana xwe hat Dîloka ku malbata wî lê dijî; li wir ji aliyê Rêxistina Bajêr a Partiya Wekhevî û Demokrasiyê ya Gelan (DEM Parti) a Dîlokê, Federasyona Komeleyên Piştevaniya Hiqûqî û Malbatên Girtî û Hikûmxuran (TUHAD-FED), Partiya Herêmên Demokratîk (DBP) û Tevgera Jinên Azad (TJA) ve li mala malbata xwe hat ziyaret kirin.
Yıldız di ziyaretê de axivî û bal kişand ser binpêkirinên mafan ên li girtîgehan. Yıldız diyar kir ku di girtîgehên ewlehiya wan bilind de di şaneyên yek kesî de dihatin girtin û tu derftên wan ên ragihandinê bi blokên din re tune bû. Yıldız anî ziman ku heke girtiyên ji heman dozê hebin bi hev re derdikevin hewşê û got, “Em du kes bûn. Ji ber ku ji heman dozê kesekî din tune bû, em bi neçarî wek du kes derdiketin.”
Yıldız da zanîn ku dema hewşê di rojê de tenê bi saet û nîvekê hatiye sînordarkirin û destnîşan kir ku tevî ku diviyabû bi rejîma înfaza normal re rûbirû bima, înfaza giran li ser wî hatiye sepandin. Yıldız got, “Ev sepan, li dijî hiqûqa wan bi xwe ye jî.”
Eren Yıldız, di 26’ê Tîrmeha 1995’an de li Orduyê hatibû destgirkirin. Yıldız ê ku di Dadgeha Ewlehiya Dewletê (DGM) ya Erziromê de hatibû darizandin, bi îdiaya “endamtiya rêxistinê” û “hewldana rakirina pergala destûrî” cezayê heta hetayî lê hatibû birîn. Yıldız, herî dawî ji Girtîgeha Girtî ya Tîpa S a Antalyayê hate berdan.
