Piştî gurbûna pêla xwepêşandanên gelêrî û bangên parastina sivîlan û rawestandina provakasyon û binpêkirinan, Meclisa Giştî ya Partiya Yekitiya Demokratîk (PYD) bi daxuyaniyekê gumanbariya xwe li hemberî geşedanên rojên dawîn ên li bajarên Sûriyeyê nexasim li Humsê, nîşan da.
Di daxuyaniyê de hat diyarkirin ku bûyerên li Humsê di encama zêdebûna provakasyona bi zanabûn, rû dan.
PYD’ê hişyarî ji domandina vê rêyê û destpêkirina aloziyeke nû û kûrkirina krîzê, da.
Di daxuyaniyê de hat diyarkirin ku ev alozî ji ber wê yekê derket ku hin alî li şûna rewşê aram bikin, gel ber bi dabeşbûnê ve bir. Her wiha li hemberî têkçûna nûnerkirina hemû pêkhateyên Sûriyeyê û xurtkirina baweriyê di navbera wan û hikumetê ve, hikumeta veguhêz a Sûriyeyê wekî berpirs nîşan da.
Di daxuyaniyê de hat gotin ku desthilatdar li şûna pêkanîna aramiyê, xwe dispêrin rêbaza parçebûn û nakokiyên eşîrî û mezhebî, her wiha berê mediyayê didin “gurkirina kîn û nefretê”, bi taybetî li dijî Hêzên SûriyeyaDemokratîk (QSD). Ev yek bûye sedema nerazîbûna raya giştî û metirsiya pevçûnek navxweyî ku aştiya sivîl dixe xeteriyê dike zêde kiriye.
Di daxuyaniyê de her wiha hate destnîşankirin ku hikûmeta veguhêz hewl dide ku her pêvajoyek danûstandinê bi Rêveberiya Xweser re asteng bike û hewlên ji bo bicîhanîna biryarên navneteweyî rawestîne.
Di dawiyê de, Partiya Yekîtiya Demokratîk (PYD) “hemû komkujî, gurkirina mezhebî û gotara nefretê” şermezar kir, û piştgiriya xwe ji bo tevgerên aştiyane, bi taybetî li herêma peravê Sûriyeyê, ku rûmet û mafên welatiyan dixwazin, anî ziman.
