Navenda Ragihandinê ya QSD’ê der barê bîlançoya 24 saetên dawî ya êrişên dewleta Tirk û çeteyên wê yên Artêşa Mîlî ya Sûriyeyê (SMO) de daxuyaniyek da. Daxuyanî bi vî rengî ye:
“Doh (Şemiyê) şervanên me tevahiya êrişên çeteyên dewleta Tirk a dagirker ên li ser nuqteyên hêzên me têk birin.
Eniya Dêr Hafirê; çeteyan bi desteka balafirên bê mirov ên dewleta Tirk ji gundê Îmamê êrişî nuqteyeke hêzên me kirin. Şervanên me bersiva êrişê dan û şerekî giran derket. Di encama şer de 2 çete hatin kuştin û yên jî ji qadê reviyan.
Eniya Bendava Tişrînê; artêşa Tirk a dagirker bi çekên giran derdora bendavê topbaran kirin. Çeteyan jî hewl dan êrişî nuqteya hêzên me ya li derdora Girê Syriatel bikin. Şervanên me bersiva êrişê da û şer derket. Êriş hat têkbirin û hin çete birîndar bûn. Di tevahiya rojê de balafirên bê mirov ên dewleta Tirk a dagirker li asîmanê herêmê digeriyan.
Her wiha balafirên şer gundê Tîna yê derdora Pira Qereqozaxê bombebaran kir. Di heman demê de bi obîsên giran, tank, roket û hawanan jî gundên Tîna, Cada, Bîr Hiso, Xeseq, Dîkan, Melha, Sinaa, girên Sêvê û Qereqozaxê topbaran kirin. Gundên navborî bi zêdetirî 70 guleyan hatin topbarankirin, di encamê de zerarên mezin li mal û milkên sivîlan bûn.”
