Navenda Ragihandinê ya Hêzên Sûriya Demokratîk (QSD) bi daxuyaniyekê agahiyên hewla ketina çekdarên hêzên Hikumeta Veguhêz a Sûriyeyê li deverên bajarê Dêr Hafir ê aliyê başûrê rojhilatê kantona Tebqayê ya Herêma Bakur û Rojhilatê Sûriyeyê parve kirin.
Li gorî Navenda Ragihandinê ya QSDˊê, komek çekdarên girêdayî hikumeta Şamê hewl da bikeve herêma Dêr Hafir û top avêtin. Hêzên QSDˊê bi tundî bersiva hewlên ketina nava herêmê da û ew hewldan têk bir.
Hêzên QSDˊê diyar kir ku aliyê ku hewl daye bikeve herêmê û binpêkirin kirine berpirsê van êrişan in û gefan li aramiya giştî dixwin. Di heman demê de hêzên QSDˊê ji şêniyên herêmê re aşkera kir ku rewş bi giştî di bin kontrolê de ye û ew her tim amade ne bersivê her êrişekê bidin.
QSDˊê di daxuyaniya xwe de diyar kir ku ew pabendî erka xwe ya niştîmanî ya parastina xakê û gelê xwe ne û her hewldaneke êriş û binpêkirinê wê rastî bersiveke tund were.
Gerînendeyê Navenda Ragihandinê ya QSDˊê Ferhad Şamî der barê mijarê de ji rojnamevanan re aşkera kir ku “Rewş aram e.”
Der barê zirarên ji ber êrişa çekdarên hêzên Hikumeta Veguhêz tu agahî nehatine parvekirin.
