Ji bo bîranîna şehîdên fermana 3’yê Tebaxa 2014’an, li başûr û bakurê çiyayê Şengalê çalakî û merasîmên gel berdewam dikin. Îro jî li komelgeha Duhola bi pêşengiya gel ji bo qurbaniyên fermanê kon hate vegirtin. Xelkê ji gundên derdor jî beşdarî çalakiya kon bûn.
Her wiha malbatên qurbaniyên fermana 2014’an û malbatên ku xizmên wan di destê DAÎŞ’ê de ne û çarenûsa wan nayê zanîn jî beşdarî merasîmê bûn.
Ji bo bîranîna qurbaniyên fermanê ku ji tî û birçîtiyê canê xwe ji dest dane, li ser rêkên esasî av û şerbet li xelk hate belavkirin.
Her wiha stranbêj û dengbêjên çiyayê Şengalê jî di çalakiya kon de amade bûn, wan jî bi stranên xerîbiyê ferman û berxwedanên li ser Êzidiyan anîn ser ziman.
