Li gundê Roboskî yê navçeya Qilabanê ya Şirnexê, di encama bombardûmana balafirên şer a 28’ê Kanûna 2011’an de 19 jê zarok 34 kes hatibûn qetilkirin ku 159 meh di ser re derbas bûn.
Hewldana Edalet ji bo Roboskî ku lêgerîna li edaletê dewam dike, weke ku roja 28’an a her mehê dike, vê mehê jî li Kolana Sakarya ya Enqereyê li hev kom bû û daxwaza edaletê careke din anî ziman.
Di daxuyaniyê de pankarta bi nivîsa “Bila kujer bêne dîtin, careke din komkujiyek mîna Roboskî rû nede” hate hildan. Daxuyanî ji aliyê endamê Komeleya Mafên Mirovan (ÎHD) Tanjû Gunduzalp ve hate xwendin.
Gunduzalp anî ziman ku 13 sal di ser komkujiyê re derbas bûne, lê hîn jî ew li pey edaletê ne. Gunduzalp got, “Malbat, gel û em bi hev re 159 meh in, 691 hefte ne, 4 hezar û 839 roj in li pey edalet, hiqûqa windabûyî ne. Sîstem, Meclîs û dadgerî hewl didin komkujiyê binixumînin.
Ji bo bûyerên qewimîne, komkujiya ku pêk hat careke din rû nede û aştî pêk were, divê mafên mirovan, aştî, edalet û azadî pêk were, dawî li bêcezahiştinê bê anîn û hesab ji berpirsyaran bê pirsîn. Cografya qeder nîne. Darizandina kujerên komkujiya Roboskî û hemû komkujiyan wê bibe sedem ku êşên bi vî rengî careke din rû nedin.”
