Girtiyê nexweş Ramazan Vûral ê ku ji girtîgêha Bolûyê tehliyê bû, piştî 31 salan li Erdîşê bi awayekê coş hate pêşwazî kirin. Pêşwaziya ku di ketina navçeyê hate kirin de li gel malbatê, gelek kes jî tevlîbûn.
Vûralê ku bi coş hate pêşwazî kirin, piştre bi konvoyekê mezin çû mala xwe ya Erdîşê.
‘EM Ê BIGIHÎJIN ARMANCA XWE’
Di pêşwazikirinê de Ramazan Vûral daxuyaniyekê kurt da û got, “hêviya me ew e ku di demekê kurt de hemû hevalên me derkevin û em bi hev re bin. Wekî ku herkes dizane em ketin pêvajoya aşitiyê. Di demekê nêz de em ê bigihîjin armanca xwe. Êdî wê yekitiya Kurdan pêk were. Kurd û Tirk çiqas bibin yek, wê pêvajo ewqas lez pêşbikeve.”
Li ser navê Komaleya Malbata Girtî û Hikûmxwaran re Piştgirî Dayînê (TUHAY-DER) Şahîn Ayaz jî di axaftina xwe de got, “heta ku em hevalê xwe ya dawî ji girtîgêhê bigirin em ê têkoşîna xwe bidomînin.”
