Di telgrafa 21’ê mijdarê de, ji dîplomatên li Ewropa, Kanada, Awustralya û Zelanda Nû tê xwestin ku rêveberiyên welatên xwe teşwîq bikin da ku koçê kêm bikin. Her wiha ji dîplomatan tê xwestin ku her bûyereke sûcê ku koçber tê de cih digirin, ji Washingtonê re ragihînin.
Di bendên zêdekirî yên ku bi taybetî ji bo welatên Ewropî hatine amadekirin, tê tekez kirin ku divê hikûmet “welatiyên xwe li hember encamên civakî yên neyînî yên koça girseyî biparêzin.” Di belgeyê de bal tê kişandin ser rîskên radîkalîzmê, têkçûna aramiya giştî û tundiya zayendî.
Ev nêzîkatî nîşan dide ku polîtîkaya koçê ya tund a ku di dema duyemîn a rêveberiya Donald Trump de hatiye pejirandin, berfirehîyek navneteweyî dîtiye.
Trump, di axaftina xwe ya li Neteweyên Yekbûyî de, “rojeva koçê ya gerdûnî” rexne kiribû û rêveberiya wî angaşt dike ku di nav DYA’yê de “mezintirîn kampanyaya dersînorkirinê ya dîrokê” dimeşîne.
Wekî din, piştî ku li nêzîkî Qesra Spî li Washingtonê du nobedarên neteweyî hatin gulebarankirin û êrîşkar jî welatiyekî Afganî bû ku di sala 2021’an de li DYA’yê bi cih bûbû, Trump ragihand ku serlêdanên penaberiyê yên Afganan heta demek nediyar hatiye rawestandin û wê hemû Afganên ku di dema Biden de ketine welat, ji nû ve bên kontrolkirin.
