Jin di nav gelek azarên zihniyeta zilamê serdest de derbas bû û heya roja me ya îro ev yek di hin cihan de berdewam e, lê belê bi derketina Rêber Apo û esasgirtina azadiya jin, roj bi roj ev zihniyet hat şikandin. Jin êdî karîbû cihê xwe di her qadên civakê de bigire, mînak wek qadên çapemeniyê, leşkerî, siyasî û hwd. Destkeftiyên Şoreşa Rojava herî zêde bi saya jin hatin bidestxistin. Niha jî pêşketina li Herêma Bakur û Rojhilatê Sûriyeyê bûye model ji tevahî cîhanê re.
Nûçegihana Rojnameya Ronahî Viyan Egîd têkildarî 8’ê Adarê Roja Jinên Kedkar ên Cîhanê ji ajansa me ANF’ê re axivî û bal kişand ser pêşketinên jin.
‘FELSEFEYA RÊBER APO BÛYE RONAHIYA TEVAHÎ JINAN’
Viyan Egîd di destpêka axaftina xwe de 8‘ê Adarê li tevahî jinan pîroz kir û wiha got: “Di destpêkê de em roja 8’ê Adarê li şehîdên çapemeniyê, bi taybet jin, dayikên şehîdan û jinên cîhanê pîroz dikin. Wekî rojnemevanên em bûn şahidê gelek bûyeran. Li kêleka vê yekê jî têkoşîn û berxwedaniya jinan di astekî herî jor de hate kirin û heya roja me ya îro tê kirin. Me bi şoreşa Rojava re dît ku çawa jin ji taritiyê hat derxistin, ev hemû jî bi saya fikir û felsefeya Rêber Apo ye, ji ber ku wî dizanîbû jina azad bingeha civaka azad e. Belê îro jin şer neke û xwe azad neke ne mumkine ku civak bigihîje azadiyê, jin bingeh, nasneme, çand û xwedawend e. Ji ber vê yekê pêwîste her jinek li gorî vê yekê tevbigere. Êdî pêwîste her jinek jiyana tarî û bindestî qebûl neke, îro roj roja banga azadiyê ye. Îro felsefeya Rêber Abdullah Ocalan bûye ronahiya jiyan û riya tevahî jinan. Ti zext û zilm nikare me ji têkoşînê dûr bike. Biryardariya me ya têkoşînê xurtir dibe.”
‘EM HEWL DIDIN TÊKOŞÎNA JINÊ BIDIN NASKIRIN’
Viyan Egîd anî ziman ku pêwîste her roj ji bo jinan 8‘ê Adarê be, ji ber ku têkoşîn wê her tim dewam bike û wiha axaftina xwe domand: “Divê jin ne tenê 8’ê Adarê, divê hemû rojan ji bo azadî û mafên xwe li qadan dengê xwe bilind bikin. Ji ber li Rojhilata Navîn pergala mêr serdeste, li dijî wê Rêber Apo giranî da bîrdoziya rizgariya jinê û li ser vê esasê rêxistinbûna jinê berfireh kir. Bi saya felsefeya Rêbertî îro li Rojava bi hezaran jin rêxistinbûna xwe ava kirine û dengê xwe bilind dikin. Em jî wekî rojnemevan hewl didin têkoşîn û berxwedana jinan a di nava şert û mercên zehmet de bi dosya û nivîsên xwe bi cîhanê bidin ragihandin. Her wiha em hewl didin felsefeya Rêber Apo bi jinan û civakê bidin naskirin, ji bo ku ew jî bikaribin ji wan qalibên ku li wan hatine ferzkirin, rizgar bibin. Armanc pêşxistina zanistiya civakê ye û xurtkirina wekheviya di navbera gelan de ye. Em wekî rojnemevanên jin soz didin ku heya dawî xeta şehîdan bişopînin û hêviyên wan ên ji bo azadiya jinê û wekheviya nav civakê pêkbînin.”
Di herî dawî de Viyan Egîd wiha got: “Tişta herî girîng a ku dikeve ser milê me, ew e ku em rê li ber êş û tundiya li ser jinan tê meşandin bigirin, di heman demê de em tekoşîn û berxwedaniya jinên Bakur û Rojhilatê Sûriyeyê ya li hember hişmendiya zilamên serdest xurt bikin û xwe bigihînin asta azadiyê. Careke din em 8’ê Adarê li tevahî jinên cîhanê pîroz dikin.”
