Hevserokê Rêveberiya Xweser a Kantona Firatê Ferhan Hec Îsa têkildarî salvegera Şoreşa Rojava û girîngiya Rêveberiya Xweser a Bakur û Rojhilatê Sûriyeyê ji ANF’ê re axivî. Ferhan Hec Îsa anî ziman ku bi Şoreşa Rojava re wan gavên dîrokî bi dest xistine.
Ferhan Hec Îsa got, “Dema ku Rêveberiya Xweser a Demokratîk dest pê kir, renginî, pir rengî û gaveke nû li Rojhilata Navîn hat avêtin, ew bi xwe çavkaniya çareseriyê ye. Di nava Rêveberiya Xweser de lingê sereke ew e ku her pêkhate azade. Ew bi xwe pir rengiya li Rojhilata Navîn de ya gelan di nava xwe de qebûl dike.”
RÊVEBERIYA XWEDER WEKE HÎLALA ZÊRÎN E
Ferhan Hec Îsa anî ziman ku Hîlala Zêrîn cihê destpêka jiyanê ye, gelek şoreş, serhildan, guhertin û gelek netewe jî di nava wê de hene û wiha pêde çû: “Rêveberiya Xweser jî niha weke Hîlala Zêrîn e û wê kevneşopiyê pênase dike. Çawa ku berê hemû netewe di nava wekheviyekê de bûn îro jî li nava Rêveberiya Xweser Kurd, Tirk, Ereb, Ermen, Asûr, Suryan, Kildan, Çerkes û gelek neteweyên din aram in. Her kes bi rêz û teqdîr weke xwe wan dihesibîne.”
RÊVEBERIYA XWESER HER KESÎ DI NAVA XWE DE DIHEWÎNE
Ferhan Hec Îsal destnîşan kir ku di nava Rêveberiya Xweser de rola jinan rola esasî ye û wiha dewam kir: “Di dîrokê de rola jina hatibû înkarkirin. Lê di nava Rêveberiya Xweser de îro jin pêşeng e û cihê xwe di her derê de weke hêmaneke esasî ye û di nava kar de jî sîstema hevserokatiyê tê bikaranîn. Ji ber vê yekê cudabûna Rêveberiya Xweser ji desthilatdariyê ew e ku ew civakeke pireng e, ne navendî ye û her kesî di nava xwe de dihewîne.”
NETEWEYA DEMOKRATÎK LI DERVEYÎ NETEWE DEWLETÊ YE
Di dewama axaftina xwe de Ferhan Hec Îsa destnîşan kir ku di dîrokê de wekheviya di navberê gelan de bi pir rengiyê gihîştiye serketinê û got: “Fikra Neteweya Demokratîk li derveyî netewe dewletê ye. Ew bi xwe jiyaneke xwişk û biratî, hevbeşî û wekhevî ye. Li derveyî vê krîz û xitimandinê ye. Li derveyî vê kuştinê ye. Tiştên ku niha li Filistîn û Îsraîlê diqewimin, tiştên ku niha li Sûriyeyê diqewimin û hemû komkujî têne kirin, hemû ji ber nêzikatiya netewe dewletê diqewimin. Piranî dixwaze hindikiyê bixwe, ew jî rê li ber xitşmandinê vedike. Ne ol, civak û ne jî qanûn jî vê yekê qebûl dike.”
ŞOREŞA ROJAVA HÊVÎ Û PAŞEROJ E
Ferhan Hec Îsa wiha dawî li axaftina xwe anî: “Ferqa di navbera Durzî, Sunî, Elewî û Ismaîlî de tine ye. Rêveberiya Xweser hemû ol, qanûn, wekhevî û beşên civakê di nava xwe de dihewîne. Şoreşa 19’ê Tîrmehê di cewhera xwe de her kesî qebûl dike û ew bi xwe hêvî ye, paşeroj e. Hemû mirovahî di nav de heye û nirxê mirovahiyê diparêze. Lewma ew ê karê xwe jî dewam bike.”
