33 ciwanên ku 20’ê Tîrmeha 2015’an li Navenda Çandê ya Amara ya li Pirsûsê di êrîşa DAÎŞ’ê de hatin qetilkirin, li bajarê Zurihê ê Swîsreyê hatin bibîranîn. Çalakiya ku ji aliyê Federasyona Karkerên Koçber a Swsîreyê (ÎFÎG) ve hate organîzekirin, bi deqîqeyekî rêzgirtinê destpê kir.
Di çalakiyê de li ser navê ÎGÎF’ê axaftinên bi Kurdî û Tirkî hatin kirin. Di axaftinan de kujer û berpirsyarên siyasî yên pişta Komkujiya Pirsûsê hatin şermezarkirin û banga têkoşîn û piştevaniyê derket pêş.
Saziyên weke Partizan, İTİF, Hetasor, İDHF û Eniya Şoreşgerî jî tevlî bîranînê bûn û piştgiriyê dan. Beşdarên bîranînê destnîşankirin ku ew ê mîrateya têkoşînê ya ciwanên ku li Pirsûsê jiyana xwe ji dest dan, bidin jiyîn.
Di daxuyaniya bîranînê de hate diyarkirin ku bi vê komkujiyê re ku bi destê çeteyên DAÎŞ’ê ve pêk hat re şer li hemberî şoreşa Rojava û ciwanên şoreşger û sosyalîst ên li Tirkiyeyê re hate vekirin.
PIRSÛS NAVÊ ÎRADEYA ŞOREŞA YEKBÛYÎ YE
Di daxuyaniyê de hate destnîşankirin ku 33 ciwanên sosyalîst ku di 20’ê Tîrmeha 2015’an de li Pirsûsê hatin qetilkirin, ji bo parastina şoreşa Rojava bi rê ketin û wiha hate gotin: “Pirsûs, navê kesên ku xwestin bi parçekirina sînorên faşîst tevlî avakirina şoreşa yekbûyî bibin e.” Her wiha hate destnîşankirin ku Komkujiya Pirsûsê operasyoneke dewletê ye ku bi destê DAÎŞ’ê pêk hat û hate bilêvkirin ku armanc têkoşîn û piştevaniya hevpar a gelan bû.”
Di berdewamiya daxuyaniyê de wiha hate gotin: “Hêviya 33 Rêwiyên Xeylan îro ji Filîstinê heta Kurdistanê, ji çiyayên Elewî heta Lubnanê li dijî dagirkerî, komkujî û kedxwariyê banga berxwedana yekbûyî ye.”
Bîranîn bi dirûşmeyên “Hesaba Pirsûsê wê were pirsîn”, “Şehîd Namirin” û “Em ê hesap ji kujeran bipirsin” bi dawî bû.
