Jinên ku li paytexta Swêd Stockholmê û li paytexta Danîmarka Kopenhagê 8’ê Adarê Roja Jinên Kedkar ên Cîhanê pîroz kirin, diyarkirin ku jinên ku li Kurdistanê tên qetilkirin, wekî kole tên dîtin û rastî her curê tundiya mêr tên, bi paradîgmaya Rêberê Gelê Kurd Abdullah Ocalan re dest bi berxwedanê kirine û destkeftî bidest xistine.
STOCKHOLM
Li paytexta Swêd Stockholmê, ji aliyê bi dehan saziyên jin û şaxên ciwanan ên partiyên çep û sosyal ve çalakiya 8’ê Adarê Roja Jinên Kedkar ên Cîhanê hate lidarxistin. Meclîsa Jinê ya Amara ya Stockholmê jî di organîzasyona çalakiyê de cih girt û çalakî li qada Sergles Torgê bi mitîngê destpê kir. Di axaftinên mitîngê de îşaret bi têkoşîna hevpar a jinan hate kirin.
Di mitîngê de ji berdevkên Tevgera Jinê ya Skandinavyayê Ayşe Dîdar axivî. Dîdar diyar kir ku jin her roj rastî tundiyê tên û bilêv kir ku ev tundî li mal, cihên kar, li siyasetê û herêmên şer çêdibin. Ayşe Dîdar destnîşan kir ku ew ê ji bo jinên ku li dijî zextên pergala baviksalarî hatine bêdengkirin û jiyana xwe ji dest dane, dengê xwe bilind bikin.
Dîdar wiha got: “Rêberê Gelê Kurd Abdullah Ocalan destnîşan kir ku azadiya jinê kevirê bingehîn a demokrasî û sosyalîzmê ye. Bêyî azadiya jinan, azadiya rast pêkan nîne. Rêxistinbûn û xweparastina me hêza me ya herî mezin e. Em bi dirûşmeya Jin, Jiyan, Azadî bi hêvî û biryardarî dikevin 8’ê Adarê.”
Beşdaran piştî mitîngê bi meşê derbasî qada Sergels Torgê bûn.
KOPENHAG
Li bajarê Kopenhag ê Danîmarkayê jinên jinên PYD’yî 8’ê Adarê Roja Jinên Kedkar ên Cîhanê li komeleya Mala Kurdan a li herêma Jutlandê pîroz kirin.
Di axaftinên çalakiyê de hate destnîşankirin ku jinên ku li Kurdistanê tên qetilkirin, wekî kole tên dîtin û rastî her curê tundiya mêr tên, bi paradîgmaya Rêberê Gelê Kurd Abdullah Ocalan re dest bi berxwedanê kirine û destkeftî bidest xistine. Her wiha hate diyarkirin ku di nava civakekî de dema jin azad nebe mêr jî wê azad nebe.
Di axaftinan de îşaret bi Banga Aştî û Civaka Demokratîk a Rêber Apo hate kirin û hate diyarkirin ku divê her kes tevkariyê li vê pêvajoyê bike.
Çalakî bi dirûşmeyên “Jin Jiyan Azadî” û “Bijî Serok Apo” bi dawî bû.
