Konseya Ewlekariyê ya Neteweyên Yekbûyî (NY) li New Yorkê bi rojeva Sûriyeyê li hev civiya. Di rapora 17’ê Kanûnê de ku beriya civînê pêşkêşî endamên Konseya Ewlekariyê hate kirin, hate gotin “Mijareke din a ewlekariyê ku endamên Konseyê di daxuyaniyên xwe de qalê bikin, bicihanîna peymana navbera Hêzên Sûriyeya Demokratîk (QSD) a bi pêşengiya Kurdan û hikumeta veguhêz e, ku di 10’ê Adarê de hate îmzekirin.”
Di raporê de hate ragihandin ku armanc ji peymanê ew e ku hêzên Kurd ên ku herêmeke dewlemend a çavkaniyan û berfireh a bakkurrojhilatê Sûriyeyê kontrol dikin, heta dawiya salê bi saziyên xwe yên sivîl û leşkerî entegreyî hikumeta nû bibin. Lê belê hate bibîrxistin ku QSD hikumeta veguhêz rexne dike ku bi çalakiyên xwe yên sala derbasbûyî ji aliyê tevgiriyê ve lawaz û yekîtiya neteweyî ve qels e û hate gotin, ji ber ku QSD’ê banga diyalogeke neteweyî ya berfireh dike, zehmet e ku peyman bi cih bê anîn.
Di rûniştina 18’ê Kanûnê ya Konseya Ewlekariyê de Alîkara Sekreterê Giştî ya ji Karên Siyasî û Avakirina Aştiyê ya NY’ê Berpirsyar Rosemary A. DiCarlo li ser mijara Sûriyeyê axivî û bal kişand ser girîngiya peymana navbera QSD’ê û hikumeta veguhêz ku di 10’ê Adarê de hate îmzekirin. DiCarlo got, “Weke pêşketineke din a erênî peymanek di navbera Hikumeta Sûriyeyê û Hêzên Sûriyeya Demokratîk de hebû, ku 10’ê Adarê hate îmzekirin. Ji bo bicihanîna peymanê hedefa dawiya salê nêzîk bûye. Em aliyan teşwîq dikin ku têkildarî aliyên siyasî û ewlekariyê yên peymanê gavên çêker biavêjin.”
