Bi sed hezaran kes beşdarî pîrozbahiya bi coş a li Amedê bûn û piştî Arhat derket ser dikê aktîvîsta Tevgera Jinên Azad (TJA) Sebahat Tûncel axivî.
BERPIRSYARIYÊN ME YÊN AVAKIRINÊ HENE
Sebahat Tûncel, banga 27’ê Sibatê ya Rêber Apo bibîr anî û destnîşan kir, ku dewletê ji bo çareseriya pirsgirêka Kurd gav neavêtiye. Sabahat Tûncel got, “Birêz Abdullah Ocalan ji dewletê re got, ‘Ez dikarim pirsgirêka Kurd ji zemîna şer derxim û bikişînim zemîneke hiqûqî’. Bang li dewlet û civakê kir. Her tişt ji dewletê nayê hêvîkirin, em ê civakeke demokratîk ava bikin. Lê belê tecrîd hê jî dewam dike û azadiya Birêz Ocalan pêk nehatiye. Berpirsyariya dewletê ye ku rê li ber aştiyê veke. Avakirina civaka demokratîk berpirsyariya me ye.”
Sebahat Tûncel, bal kişand ser daxuyaniyên Devlet Bahçelî û diyarkir ku dewlet siyaseta demokratîk dixe bin zextê û got, “Di vî warî de gavek nîne, berovajî, qada siyaseta demokratîk teng dibe. Îmamoglû binçavkirin. Her kesê ku behsa aştî û azadiyê dike bi zextan tê bêdengkirin. Em ê çawa aştiyê pêk bînin?”
RÊ LI BER SIYASETA DEMOKRATÎK VEKIN!
Sebahat Tûncel got “em desthilatdariyê hişyar dikin” û wiha domand, “Rê li ber siyaseta demokratîk vekin! Azadiya gelê Kurd azadiya Birêz Ocalan e. Heta îro çi hatibe bidest xistin bi saya berxwedanê pêk hatiye.”
Sebahat Tûncel, destnîşan kir ku têkoşîna jinan a azadiyê, têkoşîna azadiyê ya gelê Kurd e û wiha dewam kir, “Lê belê em bi vê yekê re sînordar nînin, em li dijî sîstema bi serdestiya mêr jî têdikoşin. Heta jin azad nebe civak azad nabe. Ji ber vê yekê dirûşmeya ‘Jin, jiyan, azadî’ li tevahiya cîhanê bilind dibe. Ev dirûşme felsefeyeke azadiyê ye. Em hevrêyên xwe yên jin ku em bi wan re di nav têkoşîna azadiyê de meşiyane slav dikin. Jin ji bo rêya azadî û aştiyê ya Birêz Ocalan veke, wê li ber xwe bidin.”
BANGA JI BO TÊKOŞÎN Û BERXWEDANÊ
Sebahat Tûncel bi van gotinan banga berxwedanê li her kesî kir: “Em dixwazin Serok Apo li vir bibînin. Em dixwazin li sûrên Amedê bibînin. Weke Kurd em dixwazin welatiyên wekhev bin. Weke Elewî em dixwazin welatiyên wekhev bin. Bi gelên Rojhilata Navîn re em dixwazin jiyaneke wekhev û azad bijîn. Banga têkoşîn û berxwedanê li we hemûyan dikim.”
