Gulnaş Karataş (Şehîd Berîtan) sembola berxwedana jinên Kurd û têkoşîna avakirina artêşekê bû, di 33’yemîn salvegera şehadeta xwe de li Bakur û Rojhilatê Sûriyeyê, Sûriye û Lubnanê hate bîranîn. Di bîranînan de peyama “Di şexsê şehîd Bêrîtan de têkoşîna jinan ji bo azadiyê û berxwedana li dijî xiyanetê îro jî berdewam dike” hate dayîn.
Di merasîmên bîranînê de li bajarên Çilaxa, Amûdê, Qamîşlo û Rimêlan ên kantona Cezîrê, li bajarê Kobanê yê kantona Firatê û li kantona Dêrazorê, gelê herêmê careke din xwedî li têkoşîna şehîd Bêrîtan derketin û diyar kir ku wê berxwedan berdewam bike.
Rêxistinên civaka sivîl, rêxistinên jinan, nûnerên partiyên siyasî û gelek welatî beşdarî merasîmên bîranînê bûn û bal kişandin ser “berxwedana li dijî xiyanetê”.
Qadên merasîman bi posterên şehîd Bêrîtan û Rêber Apo hatin xemilandin û girêdana xwe ya ji bo têkoşîna azadiyê ya jinan dubare kirin. Di merasîman de sînevîzyonên derbarê jiyan û têkoşîna Bêrîtan hatin pêşandan.
Li taxên Şêxmeqsûd û Eşrefiyê yên Helebê ji bo bîranîna şehîd Bêrîtan merasîm hatin lidarxistin. Di axaftinan de têkoşîna şehîd Bêrîtan hat vegotin.
Li paytexta Lubnanê Beyrûtê bi heman boneyê merasîmeke bîranînê li dar xist.
Di axaftinan de li ser girîngiya çalakiya şehîd Bêrîtan rawestiya û wiha hate gotin: “Bi keda xwe, bi xebata xwe, bi çalakiya ku kiriye, ji bo me bû dîrokek. Ji bo artêşbûna jinê bingehek ava kir. Şehadeta Heval Bêrîtan li hember xiyaneta heyî bû bersivek. Kesayetek wê ya taybet heye. Bêyî ku bitirse diaxive, rexne dike, hêz dide jinê. Heval Bêrîtan qedexebûnan derbas dike.”
Jinan anîn ziman ku ew ê mîrateya şehîd Nêrîtan bidin jiyîn û peyama “Em ê heta dawiyê li hemberî xiyanetê li ber xwe bidin; têkoşîna jina wê li ser têkoşîna Bêrîtan mezin bibe” dan.
