Osman Kiliç, rojnamevanê Çapemeniya Azad û Dîrektorê Ajansa Nûçeyan a Firatê (ANF) ku di 12’ê Adarê de li Tiel a Holandayê jiyana xwe ji dest da, bi balafirê anîn Balafirgeha Amedê û piştre jî anîn bajarê wî yê jidayikbûnê, navçeya Misirc a Sêrtê. Cenazeyê Kiliç piştre birin bajarokê Zokeyd ê navçeyê, li wir berî definkirinê merasîmên olî hatin lidarxistin. Ji bilî malbata wî, nûnerên Komeleya Rojnamevanan a Dîcle Firatê (DFG), Komeleya Rojnamevanên Jin a Mezopotamyayê (MKG), parlamenterên Partiya Wekhevî û Demokrasiyê ya Gelan (DEM Partî) Sabahat Erdogan Saritaş û Serhat Eren û her wiha nûnerên partiyên siyasî û rêxistinên civaka sivîl beşdarî merasîma cenaze bûn.
Xwişka Kiliç Sebelan Kiliçê got: “Heta jiyana xwe ji dest da em li cem wî bûn. Me ew bi tenê nehişt. Tim digot, ‘Ev jiyan bi dawî dibe, jiyaneke nû dest pê dike.’ Ez tenê ne xwişka wî bûm, hevrêya wî bûm. Em pê serbilind in. Heya sax bû têkoşiya, dest ji berxwedanê berneda. Lê êdî hêza wî têra vê cîhanê nekir.”
Sebelan Kiliçê diyar kir ku gotina dawî ya Kiliç “Berxwedan jiyan e” bûye û got ku ew ê têkoşîna wî bidomînin.
Piştî axaftinan girse ji goristanê çû. Malbat, dê şîna Kiliç li Mala Şînê ya Sirri Süreyya Onder a li Misircê deyne.
