Şerê li ser sînorê Tayland û Kamboçyayê destpê kir, du hefte li pey xwe hişt. Herî kêm 25 kesan jiyana xwe ji dest dan. Tê gotin, nêzî 800 hezar kes ji cih û warê xwe bûn. Alî hevdu sûcdar dikin ku êrişî sivîlan dikin û şer didin destpêkirin.
Di şer de ku 7’ê Kanûnê destpê kir, li gorî çavkaniyên fermî 14 leşkerên Taylandî û 11 sivîlên Kamboçyayî jiyana xwe ji dest dan.
Serokê DYE’yê Donald Trump ragihand ku di navbera herdu welatan de agirbest pêk hatiye. Lê belê rêveberiya Taylandê ev yek derewand. Dawiya hefteyê jî şer dewam kir.
Wezareta Parastinê ya Taylandê îdîa kir ku hin eyaletên li sînorê Kamboçyayê hatine bombekirin; rêveberiya Thnom Penhê jî îdîa kir ku artêşa Taylandê topbaran li herêmên sînor kiriye. Kamboçyayê deriyên xwe yên sînor hemû girt, Taylandê jî li hin eyaletên li ser sînor derketina derve qedexe kir.
Li herêmên sînor ku bi qasî 800 kîlometreyî ye û di dema mêtingeriya Fransayê de sînorên wê hatine xêzkirin, demeke dirêj mijara nakokî û lihevnekirinan e. Li herêmên navborî perestgehên Împaratoriya Khmer a berê hene. Di meha Tîrmehê de di şer de 43 kesan jiyana xwe ji dest da bûn, 300 hezar kes jî neçar mabûn warê xwe biterikînin.
Şer di demekê de jinûve geş bû ku li Taylandê Serokwezîrê muxafazakar Anutin Charnvirakul biryara hilbijartina pêşwext wergirt.
