Tevgera Civaka Demokratîk (TEV-DEM) bi daxuyaniyekê “Kongreya Diyaloga Niştîmanî” ya li Şamê red kir. TEV-DEM’ê bi bîr xist ku kongre nûnertiya gelê Sûriyê nake û tê de heman hişmendiya paşguhkirin û dûrxistinê ya rejîma berê hat meşandin.
TEV-DEM’ê diyar kir ku beşdarên kongreyê bi awayekî yekalî û ji yek qadekê hatine hilbijartin, jin beşdarî kongreyê nebûn û ji ber vê jî soza avakirina Sûriyeyeke piralî û demokratîk vala derket.
TEV-DEM’ê destnîşan kir biryarên di kongreyê de hatine girtin, li gorî berjewendiyên takekesî yên beşdaran hatine girtin û nûnerên rast ên gelê Sûriyeyê cih nagirin.
TEV-DEM’ê bi bîr xist ku ji destpêka şoreşa Sûriyeyê ve li ser avakirina civakeke demokratîk û azad li Bakur û Rojhilatê Sûriyeyê xebitîne û got: “Rêveberiya Xweseriya Demokratîk ku hemû pêkhate û çandên herêmê tê de bi cih bûn û jinan tê de pêşengtî kir, da avakirin.”
TEV-DEM’ê banga avakirina Sûriyeya nû li ser bingeha pergaleke nenavendî ya demokratîk kir, da ku jin di cihê biryardayînê bibin hevkarên bingehîn.
Di dawiya daxuyaniya TEV-DEM’ê de siyasetên paşguhkirinê hatin redkirin û îşaret bi domandina têkoşînê ji bo avakirina Sûriyeya demokratîk a nenavendî ya li gorî fedakariya gelê Sûriyeyê hat kirin.
