Cenazeyê gerîlayê HPG’ê Xebat Goyî (Ferhat Tunç) ku di 30’ê Hezîrana 2017’an de şehîd bibû, piştî 8 salan radestî malbata wî hate kirin.
Malbatê ku nimûneya DNA’yê dabû, derbarê encamê de agahî sitandin, ji bo wergirtina cenazeyê Şehît Goyî çûn Mêrdînê. Malbatê sibehê zû çû Nexweşxaneya Perwerde û Lêkolînê ya Mêrdînê, lê ji ber ku demeke dirêj muhatabek nehat dîtin, nêzî saet 17:00 cenaze wergirt. Cenaze ji bo navçeya Cizîr a Şirnexê hate birin.
Li ber Goristana Asrî ya Cizîrê girseyek kom bûbû, lê polîsan rê neda ku koma ku di nav wan de parlamenterên DEM Partiyê yên Şirnexê Newroz Uysal Aslan û Mehmet Zekî Îrmez jî hebûn, bikevin goristanê. Polîsan got ku tenê endamên malbatê dikarin bikevin goristanê. Birayê şehîd, Servet Tunç bi kelepçeyê berovajî hate girtin. Polîsan êrîşî parlamenteran û girseyê kir.
Girseyê li hemberî astengiya polîsan bertek nîşan da û ji deriyekî din kete goristanê. Dayikan bi tîlbendên xwe yên spî dirûşmên “Şehîd namirin” berz kirin, astengiya polîsan derbas kirin û cenazeyê ji destê polîsan stand.
Cenaze bi dirûşmên “Şehîd namirin” ên bi sedan kesan birin gorê. Her çendî polîsan êrîşî tabûtê kir jî, cenaze hate veşartin. Diya şehîd Rihan Tunç di merasîmê de got: “Kurê min şehîdê Kurdistanê ye. Îro ez nagirîm, îro daweta kurê min e.”
Piştî merasîmê polîsan dîsa êrîş kir û parlamentera DEM Partiyê Newroz Uysal Aslan rastî tundiyê hat. Girseyê astengiya polîsan derbas kir û çû mala malbatê.
