Trump ji Efganistanê xwest, ku baregeha di sala 2021’ê de piştî vekişîna DYE’yê kete destê Talîbanê ji ‘xwediyên xwe re’ bê dayin, naxwe wê ‘encamên xwe cidî’ be.
Trump li ser platforma medya dîjîtal Truth Socialê peyamek parve kir û got, “Eger Efganistan Baregeha Hewayî ya Bagramê radestî ya ku ew ava kiriye neke, yanî eger radestî Dewletên Yekbûyî yên Emerîkayê neke wê TIŞTÊN GELEKÎ CIDÎ BIQEWIME!!!”
Trump heman mijar beriya çend rojan li Qraliyeta Yekbûyî di roja dawî ya serdana fermî de di civîna çapemeniyê ya hevpar a bi Serokwezîr Keir Starmer re xistibû rojevê. Trump li vê derê jî bal kişandibû ser girîngiya stratejîk a baregehê ya li hemberî Çînê û gotibû, “Yek ji sedemên daxwaza me ya ji bo wergirtina vê baregehê ew e ku tenê bi saetekê dûrî cihên hilberîna çekên nukleerî yên Çînê ye.”
GIRÎNGIYA STRATEJÎK A BAREGEHÊ
Bagram ku bi 50 kîlometreyî li bakurê Kabûlê ye, baregeha herî mezin a hewayî ya Efganistanê ye. Piştî êrîşên 12’ê Îlonê di dema dagirkeriya koalîsyona navneteweyî yab i pêşengiya Dewletên Yekbûyî yên Emerîkayê (DYE) de navenda herî girîng a operasyonê ya hêzên Emerîkayê bû. Yekîneyên DYE û NATO’yê di Tîrmeha 2021’ê de ji vê deverê xwe vekişandin û di demeke kurt de welat bi temamî kete bin kontrola Talîbanê.
Trump ji dema ku li serokatiyê vegeriya û vir ve Baregeha Bagramê timî dixe rojevê û serokê DYE’yê yê berî xwe Joe Biden rexne dike ku bi rengekî ‘bê rêk û pêk’ ji Efganistanê vekişiya ye. Her wiha aciziya xwe ya ji ber zêdebûna bandora Çînê ya li Efganistanê gelek caran xist rojevê.
KABÛLÊ BERSIV DA
Ji rayedarên Wezareta Karên Derve ya Eganistanê Zakir Jalal roja Pêncşemê li ser X’ê daxuyaniyek da û diyar kir ku wê destûrê nedin ku li welatê wan leşkerê Emerîkî hebin û got, “Divê Efganistan û DYE danûstandinan bi hev re bikin, lê belê ev danûstandin nayê wê wateyê ku DYE li Efganistanê hebûneke xwe ya leşkerî dewam bike.”
