Di çarçoveya çalakiya 8’ê Adarê de ya li Wanê ji aliyê Tevgera Jinên Azad (TJA) ve hate lidarxistin, Tulay Hatîmogûllari axivî û nerazîbûn nîşanî mejiyê serweriya mêr a li nava sîstema dadgeriyê da.
Tulay Hatîmogûllari her wiha got, “Divê Tirkiye tavilê li Peymana Stenbolê vegere” û got, “Weke jin em ê dest ji mafên xwe bernedin ên ku me bi têkoşînê bi dest xistin. Em jin ‘hebûn, hene û em ê hebin’. Ji Sakîne, Sêvê, Pakîze û Hevrîn Xelef re hezar silav ku tevgera azadiyê ya Kurd, tevgera jinê ya Kurd bi rêxistin kirin û veguherandin hêmaneke esasî ya pêşeng a çalak.”
RÊVEBERIYA XWESER DIVÊ JI ROJHILATA NAVÎN RE BIBE MODELEK
Tulay Hatîmogûllari nerazîbûn nîşanî komkujiya li hemberî Elewiyan da û got, “Elewiyên li Sûriyeyê, bi komkujiya herî mezin a dîrokê re rû bi rû ne. Ji Wanê bi pêşengiya jinên Kurd, jinên Tirk em bi canên xwe yên Elewî yên li Sûriyeyê re ne. Li Sûriyeyê hîn jî operasyonên li derveyî sînor dewam dikin. Agahî ji me re tên ku li Rojava gundên nêzî Kobanê têne bombekirin. Em agahiyan werdigirin ku li ser Bendava Tişrînê operasyon têne kirin, sivîl têne qetilkirin. Divê bingeha Komara Sûriyeyê ya demokratîk tavilê bê danîn. Rêveberiya Xwese a li wê derê ava bû, divê ji tevahiya Rojhilata Navîn re bibe model. Di demekê de ku şer giran bûye, Birêz Abdullah Ocalan mohra xwe daniye binê gaveke dîrokî. Di banga ‘Aştî û Civaka Demokratîk de Birêz Ocalan rêya li dijî şer nîşan dide. Ji bo pirsgirêka Kurd a li Tirkiyeyê li ser zemîneke demokratîk û aştiyane bê çareserkirin peyamek da. Em ji vê derê bi hev re dibêjin, ‘Banga Birêz Ocalan li ser seran li ser çavan’. Ev bang ji bo jinan ronesans e.”
Piştî axaftinê koma Jin Ma derkete ser dikê û hunera xwe pêşkêş kir.
