Organîzatorê tûrnûvaya Euro 2024’ê, roja Çarşemê daxuyanî da û ragihand ku derbarê lîstokvanê millî yê Tirk Merîh Demîral bi sedemê ku piştî lîstoka bi Awûstaryê re “liv û tevgerên ne guncaw nîşan dane” lêpirsîn vekir. Maç li Leîpzîgê hate lîstin.
Lîstokvanê defansê yê 26 salî, şeva Sêşemê di maça elemeyê de gol kir û piştre bi her du destên xwe sembola “Bozkurt” a ku nîşaneya faşîzm û nîjadperestiyê ye, nîşan kir.
Demîral ev liv û tevgera nîjadperest, parast û îdîa kir ku ev tenê îfadeya serbilindiya neteweyî ye.
STP: TI ELEQEYA VÊ ÎŞARETÊ BI PÎROZBAHIYÊ RE TUNE YE
Li gorî nûçeya ajansa DW’ê ya Elman, nûnerê Rojhilata Navîn ê STP’ê Kamal Sîdo wiha got: “Ev gelek caran qewimî û di televîzyonê de zindî hate weşandin.”
Sîdo ev tişt jî got: “UEFA divê li dijî nîşandana sembolên rastgiriya tund, sekneke zelal raber bike û têkildarî silava guriyê, biryara qedexeya stadyûmê bide.”
Sîdo diyar kir ku silava guriyê “ti eleqeya xwe bi pîrozbahiyeke aştîxwaz û rewa re tune ye” û got: “Beriya her tiştî zirarê dide piraniya aliyên aştîxwaz.”
WEZÎRA KARÊN HUNDIR A ELMAN JÎ EV ÎŞARET ŞERMEZAR KIR
Wezîra Karên Hundir a Elmanyayê Nancy Faeser jî kêfxweşiya golê ya Demîral, şermezar kir û bang li UEFA’yê kir ku bikeve nav liv û tevgerê.
Wezîr Feaser wiha got: “Cihê sembolên rastgirên tund ên Tirk, li stadyûmên me tune ye.”
Wezîra Karên Hundir ev tişt jî diyar kir: “Nayê qebûlkirin ku Euro weke platformeke nîjadperestiyê were bikaranîn. Em li bendê ne ku UEFA bûyerê lêkolîn bike û pêkanînan binirxîne.”
