Li gorî Budanov, Kremlinê planên xwe yên ku ji bo sala 2030’î diyar kiribû, ber bi sala 2027’an ve kişandiye. Budanov ji çapemeniya Ûkraynayê re axivî û îdîa kir ku armanca pêşî ya Serokdewletê Rûsyayê Vladimir Putin dagirkirina welatên Baltik Estonya, Letonya û Litvanya ye. Budanov diyar kir ku Polonya weke hedefa êrişa leşkerî ya yekser tê dîtin, ne weke dagirkirinê.
Budanov anî ziman ku Moskow cîhana Rojava “lawaz, nexweş û bê biryar” dibîne û got, Rûsya hîn jî xwe weke împaratoriyekê dibîne û dixwaze qada xwe ya bandorê berfireh bike.
Li aliyê din, pisporên leşkerî jî hişyariyên bi heman rengî didin. Efserê NATO’yê yê berê Roger Housen got, eger şerê Ûkraynayê biqede, dibe ku Rûsya di nava du salan de êrişê bibe ser welatekî biçûk ê NATO’yê û ev yek jî wê bê wateya “senaryoya felaketê.”
Tê gotin, servîsên îstîxbaratê yên Dewletên Yekbûyî yên Emerîkayê jî Rûsyayê li hemberî Ewropayê weke gefeke demdirêj dibînin.
Li gorî hin çavkaniyên ku ji Reutersê re axivîn, Washington di wê baweriyê de ye ku Putin ne tenê Ûkraynayê, her wiha dixwaze hin herêmên Ewropayê yên li cografya berê ya Sowyetê jinûve kontrol bike.
Rûsya jî îdîa dike ku nêteke wan a ji bo şerê li hemberî Ewropayê nîne. Lê belê rayedarên Ewropî daxuyaniyên Moskowayê yên berê bi bîr dixînin ku berê digo, wê Ûkraynayê dagir neke û bi fikar nêzî daxuyaniyên Rûsyayê dibin.
