Êrîşên dewleta Tirk a dagirker ji 8’ê Kanûna 2024’an ve li dijî Bendava Tişrînê û Pira Qereqozaxê dewam dikin. Li dijî êrîşan gelên Kurd, Ereb, Ermen û Suryan ên li herêmê, di 8’ê Çileyê de li Bendava Tişrînê nobet dan destpêkirin. Lê dewleta Tirk vê carê jî êrîşî ser gelê nobetê digirin, kir. Di encama êrîşan de gelek sivîl hatin qetilkirin. Gelê Kurd ji bo teşhîrkirina sûcên şer ên dewleta Tirk li bajarên lê ne çalakî û bernameyên cuda li dar dixin. Welatiyên Amedê der barê êrîşên dewleta Tirk a li ser Rojava ji ANF’ê re axivîn.
‘TEVAHÎ CÎHAN DEYNDARÊ ROJAVA YE’
Welatiyê bi navê Abdûllah Erkan, gelê li Rojava li ber xwe didin silav kir û wiha got: “Gelê me yê li Rojava erka xwe bi cih tîne û li ber xwe dide. Gelê Kurd tişta ku dikeve ser milê wan li Rojava dike. Divê qada hewayî li dijî êrîşên li ser Rojava bê girtin. Gelê me tevî hemû êrîşan jî xwe diparêze. Di encama êrîşên dewleta Tirk de sivîl û rojnamevan tên qetilkirin. Rewşeke giran heye. Em van êrîşên Tirkiyeyê şermezar dikin. Divê qada hewayî were girtin û xwedî li gelê me yê li Rojava were derketin. Kurdên li Rojava mafên xwe diparêzin. Rojava dilê me ye. Tevahî cîhan deyndarê Rojava ye. Ji ber van hemû tiştan divê cîhan xwedî li Rojava derkeve.”
‘EV ÊRÎŞ NAYÊN QEBÛLKIRIN’
Welatiyê bi navê Ferrah Işik jî bal kişand ser êrîşên li ser Rojava û wiha got: “Em dixwazin êrîşên li ser Rojava werin bidawîkirin. Em ji bo vê daxwazê li vir in û Rojavayê diparêzin. Êrîşên li ser Rojava nayê qebûlkirin. Ew xak ne xaka wan e, xaka gelê Rojava ye. Em van êrîşan şermezar dikin. Gelê Rojava xwe û xaka xwe diparêze. Em êdî şer naxwazin! Ji me re dibêjin xwişk-bira lê êrîşî me dikin. Em vê qebûl nakin. Gelê Rojava destkeftiyên xwe bi têkoşîna xwe bidest xist. Em li kêleka wan in. Ev cîhan besî me hemûyan e. Em ji gelekî ji vê cîhanê ne û mafên me jî hene. Ez gelê me yê li Rojava li ber xwe dide silav dikim û serketinê dixwazim.”
‘EM JI BO AŞTIYÊ LI QADAN IN’
Welatiyê bi navê Hanefî Kaya jî wiha got: “Em ji bo aştiyê li qadan in. Em ji beriya her tiştî aştiyê dixwazin. Me wekî Kurdan her li ber xwe da. Ez gelê berxwedêr ê li Rojava silav dikim. Ji xeynî têkoşînê ti rêyeke din nîne. Rojava ji bo me rêya têkoşînê ye. Em jî wekî hemû gelan mafê xwe dixwazin û têkoşîna wê didin.”
‘XWEDIYÊN WAN XAKAN GELÊ ROJAVA YE’
Welatiyê bi navê Huseyîn Bariş jî destnîşan kir ku ew bi tu awayî êrîşên li ser Rojava qebûl nakin û wiha axivî: “Em ji bo rawestandina êrîşên li ser Rojava li qadan in. Li Rojava êrîşê sivîlan dikin. Ev êrîş mirovahiyê qetil dike. Hûn nikarin bi bombebarkirinan gelê Kurd tine bikin. Di dema xwe de Saddam û Esad vê yekê kirin, lê bi ser neketin. Ew xak ne xaka we ye. Xwediyên wan xakan gelê Rojava ye. Em dixwazin dawî li van komkujiyan bên anîn.”
