Şêniyên bajarê Kobanê li pêşiya qada jina azad kom bûn. Şêniyan ji ANF’ê re axivîn.
Dayîka bi navê Hesne Mistefa Qasim ev tişt got, “Agahî ji me re hat ku kurê min Diyar li aliyê gundê Mîlê yê girêdayî bajarê Kobanê birîndar bûye, piştre êdî me agahî jê negirt. Em nizanin ka girtî ye yan jî şehîd e. Cejn nêz bûye, em dixwazim bi Diyar re cejnê pîroz bikin. Em bang li her kesî dikin ku rabin ser piyan heta ku zarokên me tên berdan.”
Dayîka bi navê Selwa Hesen Ehmed wiha got, “Ev bûn sê meh kurê min Xebat li navbera Meskenê û Dêr Hafirê hate girtin. Ez li benda vegera wî me.”
Dayîka bi navê Werdê Berkel Misto ragihand ku kurê wê Bilind li Dêra Zorê dîl hatiye girtin û daxwaza berdana wî kir.
Dayîka bi navê Medîna Osman Hemê jî destnîşan kir ku ew dixwaze aqûbeta kurê xwe Dilbixwîn bizane.
Zehra Mihêdîn Mislim wiha got, “Ez, xwişk, bira, bav û dayîka xwe bendewarê birayê xwe Ednan Mihêdîn Mislim in. Ew 17’ê Çileyê li Reqa hat girtin û ji wê demê ve ti agahî ji birayê min tune. Em bira û xwişkên xwe dixwazin. Divê li gorî hevpeymanê, êdî ev dîlgirtî bên berdan, lê heta niha nehatine berdan.”
Zaroka bi navê Evîn Îsmaîl Mislim diyar kir ku ew û 6 xwişkên xwe li benda vegera bavê xwe Îsmaîl Mislim in.
‘ZAROKÊN MIN BI HÊSIRAN FITARÊ VEDIKIN’
Xedîce Fewzî Hec Mistefa anî ziman ku çeteyan 18’ê Çileyê hevjînê wê li ser riya Sebah El Xêr girtin û got, “Roja 19’ê Çileyê çeteyan bi telefona wî li min geriyan û gotin, ‘me hevjînê te tasfiye kiriye’. Em dixwazin êdî zanibin ka çiye rewşa wan. Zarokên min li ser fitarê bi hêsiran xwarina xwe dixwin û li benda bavê xwe ne.”
Jina bi navê Lemiya Ehmed Mihemed jî daxwaza berdana birayê xwe yê dîlgirtî kir.
