Xelkê Wargeha Penaberan a Şehîd Rustem Cûdî (Mexmûr) 11’emîn salvegera 1’ê Mijdarê Roja Kobanê ya Cîhanî bi daxuyaniyekî pîrozkirin.
Daxuyanî li ber derê salona konferansê bi tevlîbûna sedan welatiyan û bi deqeyek rêzgirtin destpê kir. Daxuyanî ji aliyê Hevseroka Dîwana Meclîsa Gel a Mexmûrê Nûdem Yaman ve hate dayîn.
Nûdem Yaman di destpêka axaftinên xwe de tevahî şehîdên Kobanê bi minetdarî bibîr anî û got: “Em di vê roja pîroz de tevahî cangoriyên xwe bibîr tînin. Em vê rojê li bajarê serkeftinê ango Kobanê li Rêbertî pîroz dikin. Bi saya wan şehîdan de ev bajar hate parastin.
Bajarê Kobanê bajarek sitratejîke. Hêzên hov ên DAÎŞ’ê xwestin dest danin ser Kobanê. Lê belê bi saya têkoşîna şehîdên me Kobanê hate parastin. Bi parastina Kobanê re Rojhilata Navîn hate parastin.
Gelek ciwan û welatiyên Mexmûrê di vê berxwedana pîroz a Kobanê de cih girtin û bûn cangoriyên welat. Keda xelkê wargehê jî di vê serkeftina mezin de hebû. Bi pêşengtiya Şehîd Zehra, Gelhat û Arîn’an de Kurdistan hate parastin. Îro gelê Kobanê gihiştiye azadiyê. Em wek xelkê Mexmûrê dibêjin; em ê heta dawî xwedî li her parçeyek an jî bihostek axa Kurdistanê derbikevin.”
Herî dawî dirîşmeyên ‘Bijî Serok Apo’ û ‘Şehîd Namirin’ hatin berzkirin.
